Pineqaatissinneqarsimasunut tusarnaartitsisoqalerpoq
Erinarsoqatigiit Noqarteq qaammatini arlalinni piareersareerput, Nuummi tusarnaartitsinissaminnut piaareersaleruttoramik.
Tusarnaartitsinissaq pillugu misileraanermi tusarnaartitsivissaq allanaalartoq unnugu orninneqassaaq, pineqaatissinneqarsimasut inissinneqartarfianni Erinarsoqatigiit Noqarteq tusarnaartitsissagamik. Erinarsoqatigiinnik aqutsisoq Isak Davidsen ima oqarpoq:
- Poorskimi aamma ornippagut, erinarsorfigalugillu, unnummannalu aamma taamaaliussalluta. Juunip 19-iani Nuummukassaagut, Hans Egedellu Oqaluffiani arfininngornermi tusarnaartitseqataassalluta. Erinarsugassagullu misilerarniarlugit pineqaatissinneqarsimasut inissinneqartarfianni inissinneqarsimasut tusarnaartitsiartorfigissallutigit. Namminersornerullu eqqunneqarnissaanut atatillugu peqataanissarput nuannareqaarput, Isak Davidsen oqarpoq.
