Pineqaatissinneqarsimasunut inissiisarfinnut utaqqisut ikileriarujussuarput

Pineqaatissinneqarsimasunut inissiisarfinnut utaqqisut amerlassusaat ukiup ataatsip ingerlanerani 350-init 90-it missaannut appartinneqarsinnaasimapput. 90-iusunit 30-t pineqaatissinneqarsimasunut inissiisarfinnut inissinneqartussanngoqqapput sinnerilu kinguartitsisoqarnissaanik assigisaanillu noqqaassuteqarsimallutik, Inatsisinik atortitsinermut ministeriaqarfiup nalunaarutaani kisitsisit ukiormanna aggustip qaammataanut atuuttut taama takutitsipput.

Kalaallit Nunaanni pineqaatissinneqarsimasunut inissiisarfinni inissaaleqineq pissutigalugu utaqqisoqarunnaarpoq, tamannalu danskit inatsisinik atortitsinermut ministeriata Morten Bødskov nuannaarutigaa.

- Kalaallit Nunaanni pineqaatissinneqarsimasunut inissiisarfinnut utaqqisoqartariaqarsimanera sivisuumik unamminartupilussuusimavoq. Utaqqisut ikileriarujussuarnerat nuannaarutigaara, pineqaatinneqarsimasummi taamaasillutik sukkanerusumik pillaatissartik atorsinnaavaat, Morten Bødskov Ritzaumut oqarpoq.

- Innuttaasut naapertuilluarnermik misigissuseqarnerannut, pineqaatissinneqarsimasunut Kalaallit Nunaannilu Pinerluttunik Isumaginnittoqarfimmut iluaqutaassaaq, inatsisinik atortitsinermut ministeri oqarpoq.

Utaqqisut ikileriarnerat ilaatigut Kalaallit Nunaanni pinerluuteqarsimasunut inissiisarfinni inissat ukiut ingerlanerini amerlineqarsimanerannik peqquteqarpoq.

Utaqqiisaasumik pinerluuteqarsimasunut inissiisarfik Kangerlussuarmiittoq, 30-inut inissaqartitsisoq, siorna septembarimi ammaqqinneqarpoq. Pinerluttunik Isumaginnittoqarfimmut 2016-ip tungaanut aningaasatigut isumaqatigiissutigineratigut Kangerlussuarmi utaqqiisaasumik pineqaatissinneqarsimasunut inissiisarfiup ingerlanneqarnera 2014-imi septembarip tungaanut sivitsorneqarsinnaasimavoq.