Pineqaatissinneqarnini naammaginartippaa

Ikiaroornartumik hashimik eqqussuisut pingasuusut ilaasa marluk pineqaatissiinneqarnerat Nunatta Eqqartuussiviata ippassaq sakkortusivaa, sakkortunerpaamillu pineqaatissinneqartussatut ilimagineqartoq, Ilulissani imerniartarfiutilik Torben Hyldgaard, sakkortunerpaamik pineqaatissinneqarpoq.

Imerniartarfiutini aqqutigalugu Torben Hyldgaard anngiortumik hashimik eqqussuisarsimavoq, ukiullu sisamaata qeqqa isertititsivimmiittussanngorlugu pineqaatissinneqarnini tupigusuutiginagulu naammaginartippaa:

- Pineqaatissinneqarnera tulluartuusoraara. Inatsisinik unioqqutitsisimasut pineqaatissinneqartariaqarput. Siornatigut pinerlunniartarsimanngilanga, Torben Hyldgaard oqarpoq, nangillunilu:

- Aputsiaq Davidsenili kukkusumik pineqaatissinneqarpoq, iliuuserisimanngisaminut pineqaatissinneqarpoq, ukiullu sisamaata qeqqa uanga pineqaatissinneqarnera tulluartuusoraara, Torben Hyldgaard oqarpoq.

Politiiusimasup Aputsiaq Davidsenip Nuup eqqartuussiviani ukiup aappaata qeqqa isertitsivimmiittussatut pineqaatissinneqaraluarpoq, nunattali eqqartuussivianit tamanna sivitsorneqarpoq, ukiuni pingasuni isertitsivimmiittussanngorlugu pineqaatissinneqarmat.

Politiiusimasoq alla, Ivik Knudsen Ostermann, sukannenerusumik nunatta eqqartuussivianit aamma pineqaatissinneqarpoq, ukiunik marlunnik pineqaatissinneqarsimagaluariarluni ukiuni pingasuni isertitsivimmiittussanngorlugu pineqaatissinneqarmat.