Pineqaatissiisarneq sakkukitsoq
Pinerluuteqarsimasut inuiaqatigiinni inooqataaleqqinnissaat anguniarlugu pineqaatissiisarneq, Pinerluttulerinermi Inatsimmi suli pingaartinneqassasoq, Kalaallit Nunaanni Eqqartuussiveqarfik pillugu isumaliutissiissummi nalilerneqarpoq.
Pinerluuteqarsimasut inuiaqatigiinni inooqataaleqqinnissaannut pineqaatissiisarnermik Ilisimatusarfimmi misissuisimasup, Marie Lyberth Mathiassenip tamanna apeqquserpaa.
-Taanna isumaq, pinerluttulerinermi inatsimmi pingaarnerussappat, taava aamma isertitsiviit tamakkua aamma naleqqussartariaqarput tassunga. Taanna isumaq pigingutsigut, taava iluamik pigisariaqarparput, pinerluuteqarsimasullu ”katsorsarlugit” imatut inissiinnarnagit, Marie Lyberth Marthiassen oqarpoq.
Taassumap nunatsinni pinerluuteqarsimasut pinerloqqittarnerat nunani avannarlernituulli annertutigisoq misissuinermini ilaatigut paasisimavaa, massa pinerluuteqarsimasut inuiaqatigiinni inooqataaleqqinnissaminnut pineqaatissinneqarnerminni pinerloqqinnginnissaat anguniarneqartartussaagaluartoq.
Pinerloqqittartullu annertussusaat Kalaallit Nunaanni Eqqartuussiveqarfik Pillugu Isumaliutissiissummit aamma eqqumaffigineqaraluarpoq, taamaattorli pineqaatisseeriaaseq attatiinnarneqassasoq kiisalu pineqaatissiinermi pinerluuteqartup inuttut atugarisaasa saniatigut pinerluutigineqartup sakkortussusaa aallaavigalugit pineqaatissiisoqartassasoq, isumaliutissiissummit siunnersuutigineqarpoq.
Tamannali Marie Lyberth Mathiassenimit apeqqusernneqarpoq.
-uanga taanna paasisinnaanngilara, sooq attatiinnarneqassanersoq, soorunami isuma nammineq ajunngikkaluarpoq, kisianni nukiit taava katersortariaqarpagut taamaliorniarutta, ilumut piviusunngortillugu.
Inuillu pinerluttunik pinerlunnernillu isiginnittariaasiat allanngorsimasinnaanerarpaa, ilaatigut pineqaatissiissutit pinerluutit sakkortussusiannit sakkukinnerungunalersimassallutik.
- Ingammik meeqqanik atornerluisunut, toqutsisunut imaluunnit inunnut ulorianartorsiortitsisunut, immaqa sakkortunerusumik pisariaqarpagut, taamaanngippat imaassinnaavoq inuit nammineq iliuuseqartalersut, sakkukigalugit inatsisit, Marie Lyberth Mathiassen oqarpoq.
