Pineqaatissiinermi nutaanik periarfissaqalissaaq
Massakkuugallartoq pineqaatisinneqarsimasunut inissiisarfiit ammasutut taaneqarsinnaapput, taakkunanilu tamani pineqaatisinneqarsimasunut inatsisit atuutsinneqartut assigiipput, assersuutigalugu inatsisit atuuttut naapertorlugit, peqqarniitsumik pinerluuteqarsimasoq pineqaatissinneqareerluni inissinneqarpat, piffissaq aalajangersimasoq qaangiukkaangat inuiaqatigiit akornanni aneersinneqarsinnaalersarpoq, tamannalu inuiaqatigiit soqutigiunnaariartoraat misissuinerit takutittareerpaat.
Pinerluttulerinermi inatsit nutaaq ukiumi nutaami atuutsinneqalerpat peqqarniitsumik pinerluuteqarlutik pineqaatisinneqarsimasut killilersuiffiunerusuni inissinneqartalissapput, aneeqqusaanatillu suliartorsinnaatitaassanatik, immikkullu pisariaqartuinnarni ilagineqarlutik anisinnaatitaasalissallutik.
Pinerluuteqarsimasut inissinneqartarfiini pisortaq Peter Jyndevad pinerluttulerinermi inatsisissamut neriuuteqarluarpoq, tassani eqqartuussiviit inuiaqatigiinnut sullissinissamut pineqaatissiisinnaalissammata.
- Pinerluuteqarsimasup akissarsiaqarani inuiaqatigiinni akunnerni aalajangersimasuni sulisarnissaa inatsimmi nutaami pineqaatissiissutigineqarsinnaavoq. Tamannalu pineqaatissinneqarsimasut inissinneqartarfiinut inissinneqarnissaminnik utaqqisut ikileriarnissaanik kinguneqassaaq, Peter Jyndevad oqarpoq.
Kalaallit Nunanni Pinerluttunik isumaginnittoqarfik pillugu aqutsisoqarfik januaarip aallaqqaataanni 2010-mi aamma pilersinneqassaaq, aqutsisoqarfiup pinerluttunik isumaginnittoqarfik kiisalu pineqaatissinneqarsimasunik inissiisarfiit akisussaaffigissavai. Aqutsisoqarfik Danmarkimi direktoratet for kriminalforsorgen-imut immikkoortortaqarfiussaaq, tassani Pinerluttunik isumaginnittoqarfik pillugu naammagittaalliutit kiisalu misiligummik iperagaanissamik qinnuteqaatit suliarineqartassapput.
Tasiilami pineqaatisinneqarsimasunut inissiisarfissaq 2011-mi sananeqassaaq. tassanilu killilersungaanerusussatut pineqaatisinneqarsimasut aamma inissaqartinneqassapput. Pineqaatisinneqarsimasunut inissiisarfiit sineriammiittut aamma killilersungaanerusunut inissiisarfittut atorneqalissapput. Kalaallit Nunaanni paarnaarussivik siulleq 2013-mi imaluunniit 2014-imi Nuummi pilersinneqassaaq, atulersinneqariarpallu Kalaallit Danmarkimi Herstedvesterimut pineqaatisinneqarsimasut tassunga utertinneqassapput.
