Pinaveersaartitsinermik suliaqartut pikkorissartinneqarnerisigut imminortarneq annikillisinneqarsinnaavoq
Pilersaarutigaarput sumiiffinni ataasiakkaani pinaveersaartitsinermik suliaqartut nukittorsarneqarnissaat, Ark'alo Abelsen oqarpoq.
Paarisa-mi angalaartoqarnikuuvoq, sumiiffinni ataasiakkaani imminornissamik eqqarsaateqartut aammalu meeqqanik kinguaassiuutitigut atornerluisoqarsimatillugu sullissisut sutigut nukittuffeqarnersut paasiniarlugit, suleqatigiikkunilluni ajunginnerpaamik qanoq angusaqarsinnaanersut paasiniarneqarlutik Arkalo Abelsen oqarpoq, ”sumiiffinni ataasiakkaani, illoqarfinni nunaqarfinnilu, pinaveersaartitsinermik suliaqartut nukiit pioreersut qanoq atorluarneqarsinnaanerat pillugu siunnersorneqarnikuupput, taakkualu piorsarneqassapput nukittorsarneqarlutillu ” Ark'alo Abelsen oqarpoq.
Ilanngullugu Ilaqutariinnermut naalakkersuisup Ark'alo Abelsen-ip erseqqissarpaa, oqarasuaatikkut saaffiginnittarfiit 136 aamma 146 sivisunerusumik ammatinneqarsinnaanngitsut sulisussat akissallu amigaatigineqarmata.
Artorsaateqartut imminornissamillu eqqarsaateqartut telefon-ikkut oqaloqatiginnittarfiat akeqanngitsumik sianerfigineqarsinnaasoq telefon 146 pingasunngornikkut arfininngornikkullu unnukkut arfineq marluniiit qulingiluat tungaanut sianerfigineqarsinnaaavoq.
Meeqqat inuusuttullu telefonikkut siunnersuisarfiat 136 unnuit tamaasa nalunaaqutaq arfineq marluniit qulingiluat tungaanut sianerfigineqarsinnaalluni.
KNR-ip qarasaasiakkut nittartagaani KNR naggat GL-imi saaffigineqarsinnaasut atuarneqarsinnaasullu takuneqarsinnaapput.
