Pilluarneq aningaasamiinngilaq
Kisianni aalisartumut Jean Pierremut manerassuarmi qeqertami Metoma-mi Australiap kangianiittumi inuusumut pilluarneq taamaappoq.
Metoma qeqertanut naalagaaffimmut Vanuatu-mik taaguutilinnut 200.000-inik innuttalimmut ilaavoq. Maannalu Vanuatu nunarsuarmi inuuffigissallugu pilluarnarnerpaatut nalilerneqarsimasoq, BBC allaaserinnippoq.
Aalisartup Jean Pierrep pilluarnerup suunera ajornanngitsumik nassuiarpaa:
- Aningaasanik ernummateqannginnissaq pineqarpoq.
Lotto-mit aningaasarpassuarnik eqquinissaq Jean Pierrep eqqarsaatiginngilaa. Matumanimi pisaa tassaavoq aningaasanik pisariaqartitsineq qimallugu inuunissaq, aningaasaaterpassuaqarluni inuunissamut taarsiullugu, aalisartoq silatooq taanna oqarpoq.
Tassa illuaraqaraanni, kuuinnartumik imeqarani, innaallagiaqarani umiatsiannguamillu ipulluni taamaallaat angalasaraanni Vanuatumiinnaanngitsoq, aammali nunatsinni nuannarineqartaqaaq.
