Meeqqat kinguaassiutaanik atornerluisartut sakkortunerusumik pillarneqartalersinnaanersut, danskit Inatsisinik atuutsitsinermut ministeriata misissornialerpaa.
Ungasinngitsukkut Dansk Folkepartiip siunnersuutigaa meeqqat kinguaassiutaanik atornerluisartut sakkortunerusumik pillarneqartalissasut. Siunnersuullu Lene Espersen-ip tigulluarsimagaa, aviisi Jydske Vestkysten allappoq.
- Meeqqat kinguaassiutaanik atornerluisartut sakkortunerusumik pillarneqartalersinnaanerat isumaqatigaara, Lene Espersen oqarpoq.
Meeqqanik atornerluisarnermut atatillugu pillaasarnermut inatsit 2002-mi sukaterneqaraluartoq, suli sukatereqqinnissaq pinialerunarpoq.
Tønderimi ataataq meeqqaminik atornerluisimasoq ukiuni qulini parnaarussassanngorlugu pineqaatissinneqareersorlu, suli sakkortunerusumik pillaasalernissaq eqqarsaatigineqarpoq.
Rigsadvokati aasamut saqqummeereerpat, folketingimi ilaasortat qanoq iliuuseqassanersut, paasinarsissaaq.