Pillaasarneq iluaqutaanersoq tuluit misissornialerpaat
Parnaarussaasut inuiaqatigiinnut utertinneqarnissaannut piareersarneqarneq ajorput ukiullu 20-t matuma siornamut sanilliullugu parnaarussat maanna marloriaatinngorsimapput.
Tamanna attanneqarsinnaanngitsoq inatsisinik atortitsinermut ministeri isumaqarpoq.
Parnaarussiveqarnerup allanngortitserneqarnissaanik pillaasarnerullu iluaqutaannginneranik oqalunneq Tuluit Nunaanni konservativenut attuumatinneqartanngikkaluarpoq.
Inatsisinilli atortitsinermut ministerip oqarneratut, 'piffiit nutaat tikissimavavut'.
- Pillaasarneq inuiaqatigiinnullu utertitsinissamut piareersaanermik siornatigut periuserisartagarput allanngortittariaqarparput parnaarussat inuunerat oqilisarlugu parnaarussiveqarnerullu inuiaqatigiinnit aningaasartuutigineqarnerujussua millisillugu, Kenneth Clark oqarpoq.
Kingulleq pillugu iluamik oqaluppoq. Tuluit parnaarussat maanna 85.000-it sinnersimavaat parnaarussaasimasullu pingasuungaagamik marluk iperangaanermik kingorna pinerluuteqaqqittarput.
Suliffeqarfiit namminersortut periusaat, tassa suliat iluatsikkaangata sullissisut aatsaat akilertarlugit, Cameron-ip naalakkersuisuisa atorniarpaat parnaarussaasussallu ikilisangaatsiarlugit. Pillaasarnerit allaanerusut aamma atortinniarneqalissapput.
- Isumatusaarnerulluta inuit pillartalertariaqarpavut, Clark oqarpoq nangillunilu: Pinerluttut navianaateqartut soorunami parnaaruttassavavut, maannali pillaariaaserput 1800-kkunni pillaasarnermut eqqaanarneruvoq ukiunullu nutaanut inuuffigisatsinnut tulluartuunani, Kenneth Clark oqarpoq.
Parnaarussivimmi sulisut oqaaseqartartuata iliuuseriniagassaq tikilluaqquaa akisussangatilluguli.
Illuatungiliuttut oqarput namminneq, tassa Labour-ikkut, naalakkersuisuutitaqarnerminni pinerluttarneq appartinneqarujussuarsimasoq. Labour-illi nutartikkap naalakkersuisuulernerata nalaani parnaarussat maanna amerlanerujussuusut tikkuarneqarpoq, tassalu tamanna inatsisinik atortitsinermut ministerip iliuuseqarfiginialerpaa.
- Pillagaasut nalinginnarmik inooqataalernissaat sulissutigisariaqarparput. Taamaaliorniaruttali iliuuseriniakkavut sapiunnata iliuuserisariaqarpavut nutarterillutalu, Tuluit Nunaata inatsisinik atortitsinermut ministerertaava oqarpoq. Danmarkip Radioa taama ilanngutassiivoq.