Pilersuisoq kiffartuussinerminik amerlanernik aningaasarsisalissaaq

- KNI-p sullissinissamik Namminersornerullutik Oqartussanut isumaqatigiissutaa aningaasartakippallaarpoq. Naalakkersuisut siulittaasuat Hans Enoksen taama oqarpoq. Taanna Siumup ataatsimeersuarnerani oqarpoq, kiffartuussinissamik isumaqatigiissutikkut nunaqarfinni nioqqutissat pisariaqarnerpaat akikinnerulertariaqartut.
Allattoq Karsten Sommer
februaarip 12-at 2008 12:13

Hans Enoksen oqarpoq, KNI-mi siusinnerusukkut siulersuisuusimasut pisortaasimasullu kiffartuussinermik isumaqatigiissusioramik naatsorsuinerliorsimasut.

- Kiffartuussinermik isumaqatigiisutit tunngaveqarput nunaqarfimmiut isorliunerusormiullu atugaasa oqinnerulernissaannik. Akikillisaassutissaapput, imaanngitsoq allaffeqarfinnik annertusaatissat, Hans Enoksen oqarpoq.

Taassuma tikkuarpaa, kiffartuussinermik isumaqatigiissutit siusinnerusukkut appartikkiartuaarneqarsimasut.

- Siulersuisut inassutigimmatigit Naalakkersuisuni soorunami malissimavagut. Massakkulli takusinnaavarput, taamatut inisseqqaannasagutta, nunaqarfimmiunut isorliunerusunilu najugalinnut pisiassat suli akisunerulersinaaasut.

Tamaammat isumaqatigiissutinut akiliutit qaffattariaqarnersut naalakkersuisut nalilersussagaat siulittaasuat isumaqarpoq.

- Nunaqarfinnut nioqqutissanik assartuineq KNI-miit nuunneqarmat, nuussiffigisatsinni siulersuisut oqarput, tapiissutit ikippallaartut. Minnerpaamik 15 millioni koruunit missaanni qaffaasoqartariaqartoq. Taakkulu malillugit inissiigatta, massakkut ullut 14-nikkaarlugit assartuisoqartalernikuuvoq, naalakkersuisut siulittasuat Hans Enoksen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq