Appat Pilersaarutit Pinngortitaleriffiup iluaqutaassasorinngilai
Aalisarnermut piniarnermullu naalakkersuisup, Karl Kristian Krusep, appanniarnerup sivitsornissaanik piniarneq pillugu siunnersuisoqatigiit kissaataat itigartisimavaa.
- Appanniarneq sivitsorneqaqqissanngimmat pitsaasuuvoq, Pinngortitaleriffimmi ilisimatooq, Aili Lage Labansen, appat pillugit aamma PhD-mik allattoq taama oqarpoq.
-Taama aalajangernerup manna maannatut apparniarnikkut ajutoornissaq ungasinerulersippaa.
Nutaarsiassarli Pinngortitaleriffimmi qiimmattaataangaanngilaq.
- Appanniartarneq unitsivinngikkutsigu ikiliartornerisa uninnissaa uppererpianngilarput.
Ukiut 20-t sinnerlugit ikiliartortut
Pinngortitaleriffiup nittartagaani UANI nunap assingatigut appaqarfinni amerlanerpaani appat qanoq ikiliartortigineri appaqarfiillu sisamat 1990-ikkunnili appaarusimasut takuneqarsinnaavoq.
Qeqertarsuup tunuani appaqarfik maannakkut appaaruteqqajaanerpaavoq, aammali Upernaviup kujataani, Kujataani Tunumilu piaqqiorfiit appaarukkiartupiloortut, Pingortitaleriffik ilisimatitsivoq.
AAMMA ATUARUK Qeqertarsuarmit kujammut Nanortalik ilanngullugu appanniarneq unittoq
- Appat piniarneqarneri arlaleriarlugit killilersimaarneqartaraluarlutik maannakkutut amerlassuseqartut ukiuni qulilikkaani ikiliartorsimasut amerliartoqqileqqullugit, ukiuni qulini appanniartoqassangitsoq inassutigaarput.
Nunanut allanut aamma akornutaavoq
Suli appaqaqisoq, piaqqiornerli ajoquserneqarsimasoq sulilu ajoqusersorneqartoq, ilisimatuup erseqqissarpaa.
- Attanneqarsinnaasumik appanniarfiusinnaasutuaarpasissoq tassaavoq Qaanaaq, Aili Lage Labansen oqarpoq.
Piffissamik kalaallit appanniarfiliisarnerat nunani tamalaani aamma malunniuteqarpoq, tassami appat Svalbardimeersut Islandimeersullu Kitaata Kujataani upernaakkut ukiakkullu piniarneqartarput.