Pilersaarusiornermut inatsisissaq pisariillisaataassaaq

Innuttaasut illuliorusuttut kommuninit sullinneqarnerat ukiortaamiit sukkanerulissaaq. Pilersaarusiorneq, aamma nunaminertanik atuineq, pillugu kommunit nammineq akisussaalernissaanik naalakkersuisut siunnersuutaat Inatsisartut akuerippassuk tamanna pissaaq.
Allattoq Jens Thorin
oktobarip 02-at 2008 09:59

Pilersaarusiorneq, aamma nunaminertanik atuineq, pillugu peqqussut 1986-imeersuuvoq, siunnersuullu kommunit maanna 18-iusut sisamaannanngornissaannut attuumassuteqarpoq.

- Innuttaasut kommuninut toqqaannarnerujussuarmik saaffiginissinnaalissapput. Kommunit aaliaagiisartunngussapput, Naalakkersuisunit anguniarneqarmat allaffissorneq pisariillisarneqassasoq, ilaqutariinnermut nalakkersuisoq, Arkalo Abelsen oqarpoq.

Arkalo Abelsen, Naalakkersuisut sinnerlugit pilersaarusiorneq aamma nunaminertat atorneqartarnerat pillugit peqqussutissatut siunnersuummik ippassaq saqqummiivoq.

Inatsisartuni partiit tamarmik siunnersuummut akuersaarput, aappassaanerneqareerlunilu atuutilerpat, innuttaasut nunaminertanik qinnuteqaataat nalinginnaasut qitiusumik aqutsisunit suliarineqartarunnaassapput. Kommunilu nammineq oqartussaaffigisamini nunaminertanik atugassiisinnaalissaaq.

Taava naalakkersuisut nuna tamakkerlugu pilersaarusiornermik, kommunit pilersaarusiornissaannut sinaakkusiisumik suliaqartalissapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq