Pilersaarusiorluarnikkut timersortartut billettit 75 procentimik akikinnerit pisiarisinnaavaat

Timersortartut kattuffiit suliffeqarfiillu attuumassuteqartut siunissami timersornermi pissartanngorniuteriaaseq oqallisigivaat
Allattoq Noah Mølgaard
maajip 16-at 2022 16:22

Ullumikkut aningaasaliissutaareersut iluanni timersornermi aaqqissuussat amerlanerit pisinnaapput. Siusissukkulli pilersaarusiornikkut aatsaat pisinnaavoq.

Siunissami pissartanngorniuteriaasissaq pillugu isumasioqatigiinnermi paasissutissat saqqummiunneqartut tamanna ilagivaat.

- Assersuutigalugu billetti 100 koruuninik akilik pisiarigaanni assersuutigalugu ukiumik ataatsimik sioqqutsilluni pilersaarusioraanni 25 koruuni taamaallaat akilerneqarsinnaavoq. Tassa 75 procent sipaarneqarsinnaavoq uagullu oqariartuutigaarput: Siusissukkut pilersaarusiortaritsi, Air Greenlandimi key account manager Peter Frederik Lyberth KNR-mut oqarpoq.

Aarlerigisamit akikinneq

Arctic Umiaq Linemi suleqatigiinnik aqutsisoq Erna Møller ilisimatitsivoq siusissukkut billettisinikkut 30 procentimik akikillisaatsinnissamut periarfissaqartoq.

Timersornermut naalakkersuisoq Peter Olsen siornatigut oqaaseqareerpoq kakkannerit sisamat unammiuaartarnerat final4 pisalersinnaappat nuannissagaluartoq tamanna nunani allani atugaareermat. Taamaattoq tamatuma piviusunngortinnissaata akisunissaa aarleqqutigisimavaa.

- Aningaasatigut sinaakkusiussaareersut iluanni kissaatitta piviusunngortissinnaanissaa qanilliallappoq. Aarleqqutigisimagaluarpara tamatuma piviusunngortinnissaa aatsaat pisinnaasut aningaasarpassuarnik aningaasaliisoqaqqinneratigut, Peter Olsen KNR-mut oqarpoq.

Siusissukkut billettit pisiarinerisigut 75 procentimik sipaartoqarsinnaanera Naalakkersuisut tusarluarnartoqartippaat.

- Paasissutissaq taanna uannut pingaaruteqartorujussuuvoq aammalu timersortartut kattuffiinut eqqarsaatissiisariaqarluni, tassani piffissaalluartillugu pilersaarusiornikkut aningaasarpassuarnik sipaaruteqarsinnaavugut, Peter Olsen oqarpoq.

Isumasioqatigiinnermi inaarutaasumik aalajangiisoqanngilaq. Saqqummiussat timersoqatigiit kattuffiata katersoreerunigit Naalakkersuisunut nalunaarusiussaaq.

Tamatuma kingorna suleqatigiissitamik pilersitsisoqassaaq isumasioqatigiinnermi innersuussissutinik suliarinneqqittussamik.