Pilatsittussat pujortarunnaartariaqarnerarpai

Napparsimasut pilatsinnissaminnik utaqqisut pilatsinnginnerminni pujortarunnaarnissaminnik neqeroorfigineqartassappat?

Taama apeqquteqarpoq Inatsisartuni ilaasortaq, Justus Hansen, Demokraatineersoq, paragraf 36-ilu najoqqutaralugu apeqquteqaammini Naalakkersuisut isumassarsiamut qanoq isumaqarnersut apeqqutigalugu.

Misissuinerit ersersippaat pujortartartut pilatsinnerminni kingunerlutsitsinissaminnut navianartorsiornerusartut, tassami pujortarnermi aap kaavinnera annikillisinneqartarmat taamaattumillu pilatsinnerminni ikii mamikkumaarnertunerusarlutik.

Sverigemi uninngasut 117-it pujortarunnaarsinniarlugit neqeroorfigineqarput, taakkualu kingunerlutsitsineri affaannanngorsimasut, siunnersuummut tunngavilersuummini Justus Hansen allappoq.

Pilatsinnermi pilatsiffiup sukkanerusumik ajorunnaarnissaa pujortarunnaarnikkut anguneqarsinnaavoq. Siunissaq ungasinnerusoq eqqarsaatigalugu napparsimasunut uninngasunut tamanna unitsitaaqqinnerit ikilinerannik, aammalu ullut napparsimaffiit ikilinerannik kinguneqarsinnaavoq, tamannallu inuiaqatigiit aningaasaqarnerannut iluaqutaassalluni.

Kiisalu pujortarunnaarneq Inuunerittap Nunatsinni pujortarnermik annikillisaaniarneranut iluaqutaasinnaavoq, tamanna Demokraatit paragraf 36 najoqqutaralugu Naalakkersuisunut apeqqutaanni tikkuarneqarpoq.