Pilaaneq iluatsilluarpoq
Angutit marluk ikiligaarujussuarsimasut - aappaa 81-inik aappaalu 32-nik ukiulllit ippassaq siullermik Nuummiit Kangerlussualiaanneqarpoq, taavalu Air Alsie-p timmisartuutaanik Københavniliaanneqarlutik, tassalu Danmarkimi nalunaaqutaq ullaassakkut tallimanut tikillutik.
Nunatsinni nakorsat pisortaat Carsten Thordahl taama ilisimatisivoq angut 81-inik ukiulik suliarineqarsimasoq suliarinninnerlu ajunngitsumik ingerlasimasoq.
- Rigshospitalimi nakorsat paasitippaannga, suliarinninneq iluatsilluartoq, 81-inillu ukiulik suli perulukkaluarluni isumannanngitsoq, Carsten Thordahl oqarpoq.
32-nik ukiulik aamma misissorneqarsimavoq, taannalu amma isumannanngitsoq, nakorsat pisortaat oqaluttuarpoq. Taannali oqarpoq ataasinngorpat aatsaat nutaamik paasitinneqaqqinnissani naatsorsuutigalugu.
Nutaarmiuni toqutsineq eqqartuussivimmi matoqqasumik suliarineqaannassanersoq imaluunniit ammarneqassanersoq, Nunatta Eqqartuussiviata ataasinngorpat aalajangissavaa.
Politimestereqarfimmi allaffissornermi pisortaq, Claus Risbjerg, Radioaviisimut ullup qeqqata siorna ilisimatitsivoq, matut matoqasuunissaannik aalajangiinerup suliareqqitassanngortinnissaanik piumasaqaat pinerluttup illersuisuanut maanna nassiunneqartoq. Illersuisup sapaatip-akunnerata naanera piffissaraa, Nutaarmiuni toqutsinerup suliarineqarnerani sooq matut matoqqassanersut tunngavilersuusiussalluni.
