Pikkorissarnermi aningaasarsiaasartut atorunnaarsippaat
Naak, politikerit suliffissaaleqisunik ilinniartitseqqikkusullutik oqalukkaluarlutik, kursusernermi aningaasarsiaasartut atorunnaarsissimavaat, aamma tamanna Namminersornerullutik Oqartussanit kommuninut nalunaarutigineqarsimanngilarluunniit.
Upernaaq kursusersimasut pikkorissarnersiutaat utertinniarlugit augustimi Sisimiuni suliffissarsiuussisarfimmiit allakkanut septembarimi ima akisoqarpoq:
AEB tilskudit kursusgodtgørelsenik tunngasut unitsinneqarsimasut med tilbagevirkende kraft 31.13.2006.
Taamaasilluni Sisimiuni suliffissarsiuussisarfimmi siunnersorti Elise Zeeb utimut atuutilersumik aningaasanik utertuugassaqarnani paaseriasaarsimavaa, taakkualu ingammik INUILImut Oqaatsinullu Pikkorissarfimmut pikkorissartitsinernut atornerusarlugit oqaatigaa.
Taamaasilluni upernaarli pikkorissarlutik aallartereersut unitsiinnarsinnaannginnamigit ingerlatiinnarpai, naak missingersuutinut amigartoorutinngortussaagaluartut.
Ukiarmannalu pikkorissarfissaraluit unitsittariaqarsimavai. Inuillu piumassuseqalersimasut uninngatiinnarnissaat ajuusaarnarnerarpaa. Sisimiummi kommuniata 100.000 kronet annaareermagit.
Elise Zeebip anguniakkat iliuutsillu paasiuminaatsippai:
”Ilinniaqqinniaritsi tamakku kursusit atorlugit kisiannili illuatungaani mattullugit taakku aningaasanik taamaammat eqqunngitsoqarami tassani”
Ilulissani suliffissarsiuussisarfiup pisortaata Thora Siegstadip tamanna aamma annaasaqaatigissavaa:
”100.000 qaangerlugu 140.000 pallillugu annaasaqaatigissavagut, kingumut paasineratigut unittinneqarsimaneranut tunngatillugu”.
Ilulissani pikkorissarnerit aningaasalersukkat Marmorilik ammarpat qaarusulerisussat ilaasa pikkorissarnerannut atorneqarput.
Massakkullu suliffissaaleqisunut iliusissatut pilersaarutit suliarineqareersut taamaatiinnartariaqarput. Suliffissaaleqisullu kisimik eqqugaasussaapput.
”Nuna tamakkerlugu politikerit oqalupput kalaallit sulisinnaasut sulisinniartigut siunissami ilaa, kisianni ukua suliffissaaleqisunaasiit arlaatigut periarfissinneqarneri unipput”
Taamatut oqarpoq Ilulissani suliffissarsiuussisarfimmi pisortaq Thora Siegstad.
Palle Frederiksen Suliffeqarnermut Inuutissarsiutinullu Ilinniartitaanermut pisortaqarfimmi pisortaq Norgemi oqarasuaamminiit oqarpoq, ajornartorsiut pilersoq Danmarkimi pikkorissarnersiutit pisortanit akilersorneqarunnaarmata, tassa Danmarkimi A-karsit inuilluunniit nammineerlutik pikkorissarnersiuteqarneq ukiormannamiit isumagisussaalersimammatigit, taamaammallu Danmarkip akilersuijunnaarnera ajornartorsiortitsilernerarpaa. Utoqqatsissutigaalu kommunit iluamik ilisimatinneqarsimanngimmata.
Maannakkullu politikerit naliligassaannik suliaqarniarluni Palle Frederiksen oqarpoq, taannalu politikerit qanoq aaliangiiffigissaneraat apeqqutaaginnassanerarpaa.
Siverth K. Heilmann isummertinniaraluaratsigu oqaaseqarusunngilaq.
