Pikkorissaasarneq ingerlatiinnarusuppaat

Namminersornerullutik oqartussat Royal Greenland Academy-ip 2007-mi ingerlanneqarnissaanut aningaasaleeqqissanersut, naalakkersuisut Royal Greenland Academy pillugu sukumiisumik nalunaarusiaq naammassineqarpat aalajangissavaat.

Royal Greenlandimi pisortaangallartoq Paaviaaraq Heilmann ippassaq Sulisoqarnermut inuussutissarsiutinilu ilinniartitaanermut naalakkersuisoq Siverth K. Heilmann ataatsimeeqatigereerlugu Academy-p 2007-imi ingerlanneqarnissaanut naalakkersuisuniillu taperneqarnissaanut isumalluarpoq.

- Pikkorissaasarnerit uagut ingerlatiinnarusuppagut, aamma siunertaqarnerusumik ingerlatsilernissaq kissaatigaarput. Ippassaq ataatsimeeqatigiinnerput pissanganartutut nalilerparput, nalunaarusioreeriaruttalu ukioq mannamut pilersaarutit ammasumik oqaloqatigiissutigisinnaanissaat neriuutigaarput. Royal greenland-imi pisortaagallartoq Paaviaaraq Heilmann oqarpoq nangillunilu. Academy-p ingerlannera annertunerusunngorlugu ingerlalernissaa, sulisartunillu pikkorissaasarnissat Naalakkersuisut peqataaffigerusuppaat. Tamannalu pissanganarpoq, pilersaarutittalu aningaasartassaanik naalakkersuisut aningaasaleeqataarusussusaat pissanganarpoq, Paaviaaraq Heilmann naggasiilluni taama oqarpoq.