Pikkorissaanerit namminneq akilertassavaat
Ilinniartitaanermut Naalakkersuisoq Mimi Karlsen oqarpoq, inatsisartunut ilaasortap Siumumeersup Malik Berthelsenip paragraf 36 najoqqutaralugu apeqqutaanut akissuteqarnermini.
Oqaatsit pillugu inatsit juulip aallaqqaataani atuutilissaaq, kisiannili suliffeqarfiit qulit sinnerlugit sulisoqartut, oqaatsit pillugit politikkissamik ilusilersuinissaminnut periarfissinneqarput, taannalu oktobarip aallaqqaataata tungaanut nakkutilliisoqarfimmut nassiunneqarsinnaalluni.
Suliffeqarfiit oqaatsit pillugit politikkimik ilusilersuisimanngitsut akiliisinneqartassapput, qanorli annertutigisumik akiliisassanersut Malik Berthelsenimut akissuteqaammi takuneqarsinnaanngilaq. Taamaattorli Mimi Karlsenip akissuteqaammini oqaatigaa nakkutilliisoqarfiup nakkutigissaagaa suliffeqarfiit assigiinngitsut pisussaaffimminnik naammassinnissimanersut, taamaattoqanngippallu nalilersuineq ingerlanneqassaaq unioqqutitsisisoqarsimappallu akiliisitsinermik kinguneqarsinnaassalluni.