Piitsut piitsunngoriartuinnarput pisuullu pisuunngoriartuinnarput
Nunatsinni pisuut pisuunngoraluttuinnarput piitsullu piitsunngoraluttuinnarlutik. Oqaatsit taakku akerliuniarluni taalliameersorinartut, taamaattoq ullutsinni piviusunngorsimapput, tassungalu kisitsisit uppernarsaatit Naatsorsueqqissaartarfiup saqqummiuteqqammerpai, kisitsisillu ukioq 2004-meerput.
Nunatsinni inoqutigiit sisamararterutaat piitsuupput, taakkulu ukiumut akileraareerlutik isertarisartagaat agguaqatigiissillugu 8000 koruuninik ikileriaateqarsimapput.
Piitsut piitsuunerulersut inoqutigiit pisuut isertitaqarneruleriartuinnarsimapput.
Nunatsinni inoqutigiit sisamararterutaat aningaasateqarnerpaajupput, taakkulu akileraareerlutik ukiumut isertittagaat agguaqatigiissillugu 163.000 koruuninik amerleriaateqarsimasut, kisitsisini Naatsorsueqqissaartarfimmeersuni erserpoq.
Nunatsinni isertitaqqortunerpaat agguaqatigiissillugu ukiumut 558.000 koruunit isertissimavaat, piitsuunerpaallu akileraareerlutik agguaqatigiissillugu 60.000 koruunit isertissimallugit.
