Piinsikkunni annersaanerit, pinngitsaaliineq eqqissiviilliortitsinerillu
Politiit arnamit inuusuttumit piinsip arfininnguutaani ullaassakkut marlunut qiteqqutilersoq sianerfigineqarput, angummit saassunneqarsimalluni.
Arnaq atuarfiup Ukaliusap eqqaatigoortilluni angummit nalusarluinnarminit tassanngaannaq saassunneqarsimavoq annersarneqarlunilu. Politiit takkummata arnap angut 20-t 30-llu akornanni ukiuliusoq isikkualu qanoq innersoq oqaluttuaraa.
Nassuiaanerit tunngavigalugit angut nalunaaquttap akunnerata affaa qaangiummat tigusarineqarsinnaasimavoq. Arfininngornerullu ingerlanerani sassartinneqarami juulip arfineq-pingajuata tungaanut tigummineqassasoq, eqqartuussisut aalajangerpaat, Qeqqata Politeeqarfiani pisortaq Janus Eigaard ilisimatitsivoq.
Pisup tullia
Arfininngornermi unnukkut qulinut qiteqquttoq nalunaarutigineqarpoq, inimi fiisteriusumi angut annersaasimasoq. Politiit takkummata paasiniaanerlu aallartillugu pisut allarluinnarmik aallartissuteqartut paasinarsivoq.
Angut 30-t sinnerlugit ukiulik angutinut allanut marlunnut annersaasoq, pisup siuninnguagut sunaaffa arnamik pinngitsaaliisimasoq. Arnaq fiisterfimmiilluni angummit pinngitsaalineqarami isersimaqatiminut oqaluttuarsimavoq. Angullu kusanaatsuliortoq paasineqariarami angutinut isersimaqatiminut saassussisimavoq marlullu annersarsimallugit.
Angut tigusarineqarpoq eqqartuussivimmullu sassartinneqarmat inunnut marlunnut 30-t 40-llu akornanni ukiulinnut annersaasimasutut aamma pinngitsaaliilluni arnerisimasutut unnerluutigineqarnissaa siunertaralugu pisut paasiniarneqarneranni ulluni 26-ni tigummigallagassanngortitaavoq.
Pisut pingajuat
Piinsikkunni pisut pingajuat angutip pineqaatissinneqarsimasunut inissiisarfimmiittup aneertilluni piliaanut tunngavoq. Angutip arnaq ilisarisimasani annersarsimavaa. Angutip naatsorsuutigisinnaanngorpaa anstaltimiinnermi sivitsorneqarnissaa.
Pisut taaneqartut saniatigut angerlarsimaffinni eqqissiviilliornerit aqqaneq-marluk politiinit orninneqartariaqarsimapput.