Piiaasut akilerneqaqqusimagaluarput
TV2-mi piviusulersaarutitut aallakaatitassiami oqaluttuarineqarpoq Somaliap sineriaata avataani danskit umiarsuaat ”Danica White” piiaasunit tigusarineqarmat inuttai iperagaasinniarlugit 4 millioner koruunit missaanni piiaasunut akiliisoqartariaqarsimasoq.
januaarip 07-at 2008 15:19
Aallakaatitassiami oqaatigineqartut naapertorlugit umiarsuup tigusarineqarnerata kinguninngua 2 millioner koruuninik akiliinissaq piareersimaffigalugu umiarsuaatileqatigiit H. Folmer & Co. nalunaarsimasut.
Tiguaanerulli nalaani umiarsuup naalagaa piiaasunut oqarsimavoq qallunaaq kinaagaluarnersoq, hr. Hansen inuttat iperagaasinniarlugit 4 millioner koruuninik akiliinissaminut piareersimasoq, inuttalli sapaatip akunnerata ataatsip ingerlanerani iperagaanngippata hr. Hansenip aningaasat Darfurimi kaattunut tapiissutigiinnarusukkai.
Taamatut piumasaqaateqartoqarmat piiaasut umiarsuup inuttaanik iperagaasitsisimanerarneqarput.
Piiaasut 8 millioner koruuninik akilerneqaqqusimagaluarput.
