Piiaasunik nakkutilliisarnissaq isumassarsiatsialaanerarpaat
Folketingimi partiit arlallit isumaqarput qallunaat sakkutuui ilaanneeriarlutik Somaliamut niullutik piiaasut atortuinik aserorterisarsinnaagaluartut.
- Taamaaliorsinnaanissaq pissusissamisuussagaluarpoq, Damarkimi umiarsuaatillit peqatigiiffianni pisortap tullia, Jan Friis Hansen, oqarpoq.
- Piiaasut sissami tammaarfiliortarput tassanngaanniillu piiaajartorlutik avalattarlutik, tassaniinnerini atortui aserorterneqartarsinnaagaluarunik unitsinneqavissorsinnaagaluarput.
Qallunaat sakkutuuini kommandørkaptajni Steen Engelbrecht Pedersen sakkutuut umiarsuaanni Somaliap avataani nakkutilliisumi juullip tungaanut naalagaasoq Jyllandspostenimut oqaluttuarpoq qallunaat sakkutuui ilaanneeriarlutik Somaliamut niusarsimasut piiaasullu atortuinik aserorterisarsimallutik.
Taamaaliorsinnaaneq FN-ip aalajangersagaasa ilaat tunngavigalugu ajornartinneqanngereerpoq partiillu folketingimiititaqartut arlallit taamaaliorsinnaaneq akuersorpaat.- Nunamili saassussinertut isigineqassanngilaq, Socialdemokratit illersornissaq pillugu oqaaseqartartuat oqarpoq.
Muslimimmi pinerliiniat muhamed pillugu titartakkat tunngavigalugit Danmark saassutissallugu piareersimapput. - Tamannali uniffiussanngilaq, Søren Espersen Dansk Folkepartiimeersoq oqarpoq.
- Muslimit ingasattajaarniat saamasaarfigisariaqanngilagut. Qanorluunniit ilioraluarutta anguniagartik anguniarsarisussaavaat. Qallunaat umiarsuaasa isumannaallisaaffiginissaat pingaarnertut pisussaaffigaarpt, Søren Espersen oqarpoq.
Piiaasut amerliartuinnarmata qanoq iliuuseqartoqartariaqartoq Danmarkimi umiarsuaatillit peqatigiiffianni pisortap tullia, Jan Friis Hansen oqarpoq.
- Umiartortut 500-it pinngitsaaliiniutitut maannakkut tigusaaqqapput, taamaammat piiaasut amerliartuinnavissapput. Afrikap kangiani nunanut niuerneq unissinnaavoq. Umiarsuaatillit ilaat Afrikap kangianukartarunnaareerput allaallu Indiap imartaanut sineriallit tikikkumaneerussinnaallutik. Pinerluttut nunarsuup ilarujussua taamaalillutik naalagaaffigilernialerpaat.
