Pihl & Søn-ip Nukissiorfimmut akiligassiissutini attatiinnarpaa

Malittarisassalli isumaqatigiissutaasullu sanaartornermi malinneqarsimasut, Pihl & Sønip pisortaa Søren Langvad oqarpoq:

- Qorlortorsuarmi nukissiorfiup sananeqarneranut atatillugu aningaasartuuteqarnerusoqartussaasoq, sanaartornermi nakkutilliisoq qangali nalunaareeraluarpoq, Søren Langvad oqarpoq:

- Sanaartornermi nakkutilliisup aalajangiineratigut sanaartorneq allatut ingerlattariaqarnikuuarput, tamannalu akisoorujussuusimavoq. Nakkutilliisup akornatsinnilu attaveqaqatigiittarnerit tamanna takutippaa, pappilissat tuusintilikkaat takussutissaatigaavut, Søren Langvad oqarpoq.

Taassuma aamma naatsorsuutigaa nakkutilliisup sanaartortitsisullu akornanni, tassa nakkutilliisup Nukissiorfiillu akornanni, tamanna pillugu attaveqaqatigiittoqartarsimassasoq.

Nukissiorfiit pisortaat Svend Hardenberg Søren Langvadip ukiut pingasut matuma siornatigut naapissimanerarpaa, Qorlortorsuarmilu sanaartornerup ajornartorsiuteqarfiunera taamanikkut ilisimatitsissutigisimanerarlugu.

Sanaartornerup sukkanerpaamik naammassineqarnissaa aallunniaritsik, Søren Langvadip taamanikkut oqaatigisimanerarpaa, inatsisitigullu ajornartorsiutaasinnaasut kingorna isumaqatigineqarumaartut neqeroorutigalugu, Svend Hardenbergili taamanikkut oqarsimanerarneqarpoq eqqartuussisutigoornagu oqaloqatigiittoqarsinnaasariaqartoq.

Taamanikkulli attaveqaqatigiittoqarsimanngitsoq Søren Langvadip oqaatigaa.

Isumaqatigiinngissutaasorli isumaqatigiissitsiniartartutigut naammassineqarnissaa pillugu Søren Langvad ima oqarpoq:

- Isumaqatigiissitsiniartutigut suliarinnitoqaraangat piumasarineqartut sinnerlugit pisoqarneq ajorpoq. Tassa imaappoq, piumasaqaatigut tassaasut 220 millioni koruunit ataallugit tunineqassagunarpugut, Pihl & Sønip pisortaa Søren Langvad Radioaviisimut oqarpoq.