Pigisat nalillit akileraarusersulernissaat siunnersuutigaat
- Inuiaqatigiinni assigiinngitsunik isertitaqartoqarpoq, isertitalli tamarmik akileraarusersorneqarneq ajorlutik, ataatsimiititaliap siulittaasua, Århusip universitetiani professor Torben M. Andersen oqarpoq.
Assersuutigalugu aktiaatinit pissarsiat namminerlu illoqarnikkut iluanaarutit akileraarusersorneqarneq ajorput. Tassalu atugarissaarnerup pitsanngorsaarnissaanut inuiaqatigiinni aningaasassaqaraluarpoq.
Ataatsimiititaliaq taamaammat aperivoq, inigisap nalinganit akileraarutinut akiliisoqarneq ajornera ilumut naleqquttuunersoq. Tassami inuiaqatigiinni ulapaarnerusoqaleriartortillugu inissanik piumasoqarnerulertarpoq, taamaammallu inissat akitsortarlutik.
- Akileraartarnermi pissutsit ilaat taanna allanngortinneqarsinnaavoq. Ininut nammineq pigisanut akileraaruteqalerpat, akileraarutitigut akilersuineq assigiiaarnerulerlunilu naapertuunnerulissagaluarpoq. Tassalu sulinermit akileraarutit qaffanngikkaluarlugit, akileraarutitigut isertitat amerlineqarsinnaasut, ataatsimiititaliap siulittaasua oqarpoq.
Aamma nunaminertat, angerlarsimaffiit inissisimaffii, akileraarusersorneqarsinnaasut, ataatsimiititaliaq isumaqarpoq.
Kisianni Nunatsinni inuit ataasiakkaat nunamik piginnittuunngillat. Illuliorfigisimasap atornissaanut taamaallaat piginnnaatitaaffeqarpugut.
Taava nuna piginngisaq pillugu akileraartitaasoqarsinnaava?
- Nunaminertap atorsinnaatitaanera naleqarpoq. lllulu tassaniittoq tunineqarpat, nunaminertap nalinga ilanngullugu akilerneqartarpoq. Illut ilaat pitsaanerusumi inissisimapput. Inuisalu illu tunigaangamikku, nunaminertap, inuiaqatigiinnit atugassiissutigineqartup, atorsinnaatitaanera ilanngullugu tunisarpaa. Tassalu iluanaarutitassaa, inuiaqatigiit pissaraluat, namminneq pissarsiaralugu, Torben M. Andersen oqarpoq.
Aamma akileraarusersorneqarneq ajortoq alla qissimigaarneqarsinnaasoq tassaavoq pappialanit nalilinnit, soorlu aktianit, isertitat:
- Sulinikkut isertitat akileraartarnermi kisiisa isumalluutigigaanni, inuit amerlanerusut sulinissaat unikaallatsittoorneqarsinnaavoq. Taamammat akileraartitsisarneq qanoq ittuussanersoq eqqarsaatigisariaqarpoq, imminullu aperaluta, isertitat assigiinngitsut tamarmik assigiimmik akileraarusersorneqassannginnersut, Akileraartarneq atugarissaarnerlu pillugit ataatsimiititaliap siulittaasua, Torben M. Andersen, oqarpoq.
