Piginneqataanertik iluanaarutigissaqaat
Grønlandsbankip 2010-mi natsorsuutini pitsaalluinnartut piginneqataasunut 2.567-iusunut pissaqartitsilluartut ullumi saqqummiuppai. Ukiup ataatsip ingerlanerani aningaaseriviup nalinga 382-imiit 475-imut qaffariarpoq.
Taamaasilluni Grønlandsbanken Dronningeqarfiup iluani aningaaserivinnut ingerlalluarnerpaanut ilannguppoq. Aningaaseriviullu ukiumoortumik naatsorsuutaasa takutippaat sooq taamatut inissinnersoq. Silarsuarmi aningaasaqarniarnikkut ajornartorsiornermit aningaaserivik qangali sunnerneqarsinnaajunnaareersimavoq.
Akerlerpiaanilli aningaaserivik ingerlaluaqaluni ukioq manna aammaarluni 100 miliuunit pallillugit, tassa 98,2 millioni koruuninik sinneqartooruteqarpoq. 2009-mut sanilliullugu millioninik marlussunnik sinneqartoornikinnerulluni, tamannali aningaaseriviup pappiaqqanik nalilinnik pigisaminik erniakitsitsineranik pissuteqarpoq. Erniakitsitsinerli oqaluttuarisaanermi aatsaat taama appasitsigisoq illuutillit iluarusuutigaat.
Sinneqartooruteqarnerli aningaasaatit tiguinnarissanit 14,1 procentimik iluanaarutaavoq. Tamannalu naalagaaffiup iluani aningaaserivinnit nallerneqarsinnaanngingajappoq.
Pappiaqqat piginneqataassutit, aktiat naleqarnerulernerisigut aamma piginneqataasut agguagarseqqissapput. Naalagaaffiup aningaaserivinnut ikiuiniarneranut siullermut akulerussimaneq sinneqartoorutinit agguagarsisarneq unitsikkaluarpaa, maannakkulli Grønlandsbankip tamanna anigulerpaa. Taamaalilluni aningaaseriviup siorna ukiaanerani iluanaarutaanit piginneqataasut agguagarsisinnaassapput. Katillugit 18 millioni koruunit piginneqataasunut agguaanneqassapput.
Aningaaseriup kaaviiaartitai aamma pitsaalluinnarput, siorna 4,5 milliardi koruuniullutik. Aningaaserivimmit atukkiunneqartut 4,6 procentimik qaffariarlutik 2,9 milliardi koruuninngorput. Piffissamilu tassani aningaaserivimmik atuilersut nutaat iluaqutigalugit 3,4 milliardi koruunit atuisunit aningaaserivimmiitinneqarlutik.
Pigisat nalikillineri ileqqaarutillu 14,6 miliuuni koruuniupput allatut oqaatigalugu aningaaseriviup atukkiussaasa sillimmasiissutillu 0,4 procentii. Ileqqaarutit affaat naalagaaffimmit ikiuutinut sillimatissaapput.
Taavami taava ernumanartoqanngila? - Aningaaserivimmi pisortap Martin Kviesgaardip tusagassiuutinut nalunaarummini allanneratut; ernumanartoqarpianngilaq. Namminersorlutik inuussutissarsiortut mikinerit ilaasa akiliiniarnerminnut atatillugu ajornartorsiornerat killeqartupilussuummat annaasinnaasat ernumananngillat.
Grønlandsbankip ukioq manna kaaviiaartitassaasa sinneqartoorutissaasalu siornatut annertutiginissaat ilimagineqarpoq.
