Piginnaanngorsaqqiineq iluatsilluartoq
2009-mi inuit 405-it piginnaanngorsaaqqiinermik ingerlatsisimasut - 2010-milu pineqartunit 118-it ataavartumik suliffeqalersimapput. Tassa quliugaangata pingasut missaat suliffeqalersarmata, nutaarsiassaq tamanna qiimmannartuusoq, Naalakkersuisut isumaqarput.
- Angusaasut pitsaasut assut nuannaarutigaakka. Kisitsisimmi ukua takutippaat, inuit suliffissaaleqisut killeqartumik sulisinnaassuseqaraluarlutik nunatsinni suliffeqarnermi periarfissaqartartut. Tamannalu assut nuannaarutigaara, Inuussutissarsiornermut Aatsitassarsiornermullu Naalakkersuisoq Ove Karl Berthelsen taama oqarpoq.
2010-mi inuit piginnaanngorsaqqinnermik ingerlataqartut ukiumut siulianut sanilliullugu 70-inik amerleriarput. Ove Karl Berthelsenillu oqaratigaa "kommuninut paasissutissiisarnerup immikkut ittumik annertusineqarsimanera, - tassani piginnaanngorsaqqinnissamut pikkorissarnissanullu periarfissat suliffissarsiuussisarfinni siunnersortinut paasissutigineqartarsimammata" amerleriarnerannut tamanna pissutaasoq.
Piginnaanngorsaqqinneq inunnut killeqartumik sulisinnaassuseqartunut suliffeqalernissaannik periarfissiinerorusulluni pilersinneqarsimavoq. Anguniagarlu taanna ilinniagaqarnikkut, sungiusaanikkut ilinniaqqinnikkulluunniit anguneqarsinnaavoq.
