KNR PIGGAPPAAT KNR-ip quiasaarutiginninnermik isiginnaagassiaraat nutaaq
Maanna KNR isiginnaagassiamik nutaarluinnarmik kalaallisut oqaasertalimmik isiginnaagassiamik saqqummiussaqarpoq tassaavorlu ”Piggappaat” Hans Jukku Noahsen-imit ingerlanneqartussaq.
Siornatigut Hans Jukku Noahsen TAMASSA-mi ingerlatsisuusarsimavoq aammalu quiasaarisartuullunilu nipilersortartuulluni. Maanna septemberip pingajuanit KNR-ikkut aallakaatitassiami nutaarluinnarmi ingerlatsisussanngorpoq.
Aallakaatitassiaq quiasaarinermik, aliikkusersuinermillu imaqassaaq inersimasunullu saaffiginnittuussalluni.
PIGGAPPAAT nammineq immikkut nipilersortartoqassaaq, isersimasunik isiginnaartoqartassalluni aammalu sapaatit akunnerikkaartunik pulaartoqartassalluni. Pulaartut sammisanik itisuumik tigunneriaaseqassanngillat inuiaqatigiinnullu tunngasunik ilisimasaqartassapput.
PIGGAPPAAT-mik isiginnaartut naatsorsuutigissavaat ingerlatsisup Hans Jukku Noahsenip unneqqarilluinnarnissaa quiasaarutiginninnerullu aammalu oqqassaarinerup akornanni oqimaaqatigiiffaarittumik saqqummiussaqartarnissaa. Tamanna pillugu PIGGAPPAAT nal. 22.00 aallakaatittartussanngorlugu inissinneqarsimavoq, Heidi Møller Isaksen isiginnaagassiamut aaqqissuisoq oqarpoq.
Ullumikkut oqallisaanera, quiassaarutiginninneq ikasarnerlu
Hans Jukku Noahsen septemberip pingajuat aallarnerlugu pingasunngornerit unnukkuini isiginnaarutikkoortassaaq. Tamassumap pinnginnerani facebookikkut nittartagaliortoqassaaq tassanilu aaqqissuisut paasissutissat kingulliit aallakaatitassiallu imarisai nittarsaattassavaat.
Isiginnaagassiap saqqummiunnissaa qilanaaraarput neriullutalu amerlasuunut ajuallatsivallaassanngitsoq, KNR-ip pisortaa Søren Lennert Mortensen taama oqarpoq. Taassumallu erseqqissarpaa aallakaatitassiaq inersimasunut saaffiginnittuusoq suussusaalu quiassaarutiginninnerusoq ilumoorsaarpallaanngitsoq itisuumillu tiguneqartussaanngitsoq. Qularinngilara isiginnaartut soqutiginnilluarnissaat, Søren Lennert Mortensen nangippoq.
KNR ineriartorpoq
Isiginnaagassiaq aallakaatittakkatta pissanganartut ilagaat. Maannakkut ulappuppugut qilanaaralugulu piffissami uani nutaanik pilersaaruteqarfiusumi aallartinnissarput. Neriuutigaarput aallakaatitassiat ilassilluarneqassasut, Søren Lennert Mortensen naggasiivoq.
Paasissutissat allat pissarsiarineqarsinnaapput uunga, Hans Jukku Noahsen hjn@knr.gl
oqarasuaat 36 15 00
