Piffissaq eqqorlugu akilersuinngikkaanni erniat amerliartuinnartarput

Eva Rosing, Aasianni najugaqartoq, ima misigisaqarsimavoq. Akilersugassanik pisissagaanni sianigeqqinnaartariaqarpoq.

Tamanna Eva Rosingip paasivaa, panini GU-mi atuartoq iluaqutissaanik angallattakkamik qaraasaasiarsigamiuk.

- Paasisakitsuaraavunga, qanorlu erniakitsiginissaanik nassuiaanneqarnanga.

Qaammaammut akilersuisussaanera nalunngiinnarpara, tassani isumaqatigiissutigaarput kontonnit aningaasat piiginnarneqartassasut.

Qarasaasiaq angallattagaq 6.939 koruuneqarami akiitsunut aningaasartuutit 8.181 koruunit, taamaalilluni qarasaasiaq 15.120 koruuneqalerpoq, Eva Rosing oqarpoq.

Eva Rosingip akiligaasa taama amerleriataarnerannut ilaatigut peqqutaavoq, qaammatit ilaanni akiliinngitsoortarsimammat:

Sooq aningaasanik atortariaqarsimavit?

- Aningaasaqarniarnera ajormat, taannalu tunissutissatut pisiaralugu, uannut oqinnerussasoralugu, sunaaffa imminut artukkiinnarlunga, Eva Rosing oqarpoq.

Pisiniarfik Nuummiittoq, Grønlands Radio Center, Eva Rosingip naafferagassaminik pisiffigisimavaa. Tassanngaannit oqarput, pisiniat arlallit pisussaaffimminnik tamakkiisumik naammassinninneq ajortut arlaqartut.

- Pisiniartut paasitinniartarpagut, ernialersukkamik akilersuisussaasut nalunngereertussaavaallu, isumaqatigiissut malinnissaat namminneq akisussaaffigigat, Grønlands Radio Centerimi sulisut ilaat Otto Martinsen oqarpoq.