Avatangiisit Nunanit allanit

David Attenborough: Piffissaarutilerpugut

Silap pissusiata allanngoriartornerata nunarsuarmioqatigiinnut akornutaasinnaanera ukiuni tuusintilinni aatsaat taama aarlerinaateqartigivoq, iliuuseqarfigineqanngippallu tamatsinnut ajorluinnartumik kinguneqassaaq.
David Attenborough. Asseq toqqorsivimmit. Assi © : Taylor Herring/Flickr Creative Commons
Allattoq Karsten Sommer, DR
decembarip 04-at 2018 07:08
Nutserisoq Simon Uldum

Pinngortitalerisoq nunarsuaq tamakkerlugu tusaamasaasoq nersornaaserneqarsimasorlu, David Attenborough, Naalagaaffiit Peqatigiit Silap pissusia pillugu Polenimi Katowicemi ataatsimeersuartitsineranni, COP24-mi, ataasinngormat oqalugiarami taama oqarpoq.

- Iliuuseqanngikkutta nunarsuarmioqatigiit ajalusuussapput pinngortitallu ilarujussua asiussaaq, 92-inik ukiulik David Attenborough taama oqarpoq.

Silap pissusia pillugu isumaqatigiissummi, ukiut pingasut matuma siorna atsioqatigiissutigineqartumi, immikkoortut arlallit isumaqatigiissutiginiarlugit nunarsuarmi nunat ataatsimeersuarnermi katersuupput.

David Attenborough, ilaatigut BBC-p pinngortitaq pillugu aallakaatitassiaanut ”Nunarsuarput tungujortoq”-mut siuttuusoq naapertorlugu, nunarsuarmi nunat iliuuseqarnissaq isumaqatigiissutigissagunikku silap pissusia pillugu isumaqatigiissut ”allannguutinik atasinnaasunik” kinguneqarsinnaavoq.

- Nunarsumioqatigiit piumasaat paatsuugassanngilaq. Piffissaarutilerpugut, ilissilu aalajangiisartuususi iliuuseqaqquaasi, David Attenborough oqarpoq.

Naalagaaffiit Peqatigiit Silap pissusia pillugu ataatsimeersuartitsinerat decembarip 14-iani naammassissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq