Picassop titartagarpassui qalipagarpassuilu Frankrigimi pigineqarput
Innaallagisserisoq 71-inik ukiulik oqarpoq, qalipakkat Pablo Picassomit imminermut tunissutaasut.
Qalipakkat 60 millionit eurot sinnerlugit - imaluunniit 450 millionit koruuninik - paasisimasarluartunit nalilerneqartut - Frankrigimi aviisit ilaanni, Liberationimi, allaaserineqarpoq.
Aviisimi allaaserineqartut aamma naapertorlugit titartakkat qalipakkallu 271-iupput. Innaallagisserisoq Pierre Le Guennec, Picassollu kingornussisussai eqqartuussivikkoorlutik maanna assortuupput, kingornussisussammi isumaqarput titartakkat qalipakkallu innaallagisserisup tillissimagai.
- Eqqumiitsuliortorsuup taama naleqartigisunik tunisisimanissaa kialuunniit upperinavianngilaa, kingornussisussat eqqartuussissuserisuat, Jean-Jacques Neuer, oqarpoq.
Innaallagisserisoq oqarpoq, Picassop 1973-imi toqunissaa ukiunik pingasunik sioqqullugu angerlarsimaffiisa ilaanni arlalinni, ilaatigut Cannesimi, tillinniartoqartillugu kalerrisaarutinik ikkussuisimalluni. Taavalu titartakkat qalipakkallu Picassop nulianit Picassomilluunniit tunissutisiarisimagini.
