Piareersimasunut siarnguttorpassuit

Nuummi ”Piareersimasut”-nut 2007-mi januaarimit apriilimut sianerlutik oqaloqatiginnittut 100-t missaanniipput, taakkunannga 44-t imminut toqunnissaminnik eqqarsaateqarput, 32-t imminut toqunnissaminnik eqqarsaateqartunut ilaqutaapput, sinnerilu inuuniarnermikkut ikiortariaqartutut saaffiginnissimapput.
septembarip 17-at 2007 15:36

Imminut toqunnissamut Nuup Kommuneata pinaveersaartitsisui ”Piareersimasut” ukiup ataatsip matuma siornagut, tassa 2006-imi maajip qaammataani, pilersinneqarput.

”Piareersimasut” pilersinneqarput, upernaakkut qaammatialunnguit ingerlaneranni inuit qulingiluat imminut ukioq kingulleq toqoreersullu.

Oqarasuaat atorlugu attaveqarsinnaalernerup siunertaraa imminut toqunnissamik eqqarsaateqarsinnaasut Nuummi nunaqarfiinilu pinaveersimatinniarneqarnissaat.

Oqarasuaatikkut attaveqaat 55 57 38 ullut tamaasa ullaakkut nalunaaqutaq arfineq-pingasuniit ualikkut sisamat tungaanut ammasarpoq, unnukkullu nalunaaqutaq arfineq-marluniit qulit tungaanut ammasarluni.

Imminut toqunnissamut nuna tamakkerlugu pinaveersimatitsisut nutaat oqarasuaatikkut ukioq manna aggustip qaammataaniit attavigineqarsinnaalerput, oqarasuaatip normua tassaavoq 146, tassa 146.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq