Piaarinaatsoornikkut pinngitsaaliineq atulersikkusuppaa
Nammineerluni piumagami. Pinngitsaaliilluni arnerisimasutut pasisamit taama nassuiaaniartoqartarpoq. Taamatullu oqartoqaraangat pinngitsaaliilluni arnerisup pineqaatissinneqarnissaa ajornakusoortaqaaq. Aviisip Berlingske Tidendep nittartagaani taama allaaserinnittoqarpoq.
Inatsisinut ilisimatuup aamma eqqartuussiveqarneq pillugu inuiaqatigiillu inooriaasiinik immikkut ilisimatuup, Københavnimi Universitetimeersup, Flemming Balvigip, ukiuni kingullerni pingasuni pinngitsaaliilluni arnerinerinerit nalunaarutigineqartartut misissoreerlugit paasisani tupaallaatigai.
- Pinngitsaalillugu arneriffigineqartoq pinngitsaaliisorlu imminnut ilisarisimakkajuttarput - angullu pinngitsuunerarpat oqarlunilu, arnaq nammineerluni piumasimasoq, inatsisit maanna atuuttut pissutigalugit angutip pillarneqarnissaa ajornakusoorsinnaasarpoq, Flemming Balvig oqarpoq.
Aviisimi akeqangitsumik agguaanneqartartumi, Urbanimi, sapaatip akunnerani kingullermi atuarneqarsinnaavoq, pinngitsaaliilluni arnerinerit nalunaarutigineqartut tallimaagaangata, taamaallaat ataaseq pineqaatissiinermik kinguneqartartoq.
