Pia Vedel: Danskit akisussaaqataajumannginnertik takutiinnassavaat

- Sooq inuit taaseqataanngittarnersut pillugu nalinginnaasumik isummersuutit takutittarpaat, taaseqataanngitsut tassaasartut politikkimi takornartartut misigisut, kisianni Kalaallit Nunaanni pissutsit killormoortutullusooq ipput, Pia Vedel Ankersen aallartippoq.

Tamat oqartussaaqataanerat eqqarsaatigalugu danskit taaseqataaniannginnerat ajornartorsiuterujussuunerarpaa.

- Danskit taaseqataaniannginnerat akisussaaqataajumannginnertut taasariaqarpoq, Ilisimatusarfimmi Ingerlatsinermut isumaginninnermullu institutimi lektori Pia Vedel Ankersen oqarpoq.

- Nunani allani takuneqartareerpoq taaseqataanngitsut tassaanerusartut politikkikkut oqartussaaqataanerup avataaniittutut misigisut. Assersuutigalugu Sverigemi taaseqataasanngitsut tassaallutik inuiaqatigiinni pissakinnerpaat. Kisianni Kalaallit Nunaanni pissutsit allaalluiinnarput. Danskit Kalaallit Nunaanniittut ikinnerusuteqaraluarlutik pigissaarnernut ilaapput.

- Danskillu ilaasa taaseqataarusunnginnerat Kalaallit Nunaanni nunaqavissut nunaminnik ineriartortitsinerannut sunniuteqarusunnginnermik pissuteqaannarunarpoq imaluunniit siunissami pisussanut pisuutitaarusunnginnermik aallaaveqarunartoq, Pia Vedel Ankersen eqqoriaavoq.

Pissusilersorneq taamaattoq pitsaanngitsutut isigaa, oqarluni inuiaqatigiinni demokratii tunngavigalugu ingerlatsinermut danskit akisussaaqataajumannginnertik taaseqataannginnermikkut takutiinnassagaat.

- Tamanna akueriuminaappoq, soorluttaaq kalaallit Danmarkimi najugallit taaseqataasanngippata akueriuminaatsoq. Uanga inuttut ima nalilerumavara: Danskit isummerniarlik Namminersornerlu pillugu taasisitsisoqalerpat taaseqataallutik, Ilisimatusarfimmi Ingerlatsinermut isumaginninnermullu institutimi lektori naggasiivoq.