Pia Kjærsgaard paasiniaalaaqqaarluni akuliuttarniarli

Mianersortunik oqaaseqarluni – Hans Enoksen ullumikkut allappoq, - Danmarkimi naalakkersuisunngortitsinissamut atatillugu Kalaallit Nunaata inunnik isumaginninnikkut ajornartorsiuteqarnera pissutigalugu, Dansk Folkepartip siulittaasuata, Pia Kjærsgaardip Kalaallit Nunaata Danmarkimit aqunneqalernissaanik piumasaqaateqarlersaarnini nalunaarutigaa.

- Taama periuseqarneq nakkutiginninniarpallaarneruvoq. Ajornartorsiutit annertuumik akiorniarsaraavut innuttaasullu suli annerusumik peqataanissaannik kaammattortuarpavut, naalakkersuisut siulittaasuat taama tunngavilersuivoq.

- Naalakkersuisut Danmarkimi naalakkersuisunik ajunngitsumik siunertaqarluni oqaloqatiginninnernik ingerlatsinissanik piumassuseqarput. Oqaloqatigiinnerni taakkunani assersuutigalugu Kalaallit Nunaanni ajornartorsiutit qanoq iliorluni suleqatigiissutigineqarsinnaanerat, soorlu immikkut ilinniarsimasunik amigaateqarnernut atatillugu, eqqartorneqarsinnaavoq, Hans Enoksen allappoq nangillunilu, oqaloqatigiinnerit taamaattut soorunalimi pissutsinik pissusiviusunik aallaaveqartariaqartut, imaanngitsorlu uppernarsarneqarsinnaanngitsunik taamaassorisaannarnillu tunngaveqassasut.

Naalakkersuisut siulittaasuata naggataatigut Pia Kjærsgaard kajumissaarpaa, nunatsinni pissutsinik ilisimasalissuartut nittarsaatinnginnermini, Kalaallit Nunaanni inunnik isumaginninnikkut ajornartorsiutinik akiuiniarluni minnerunngitsumillu pinaveersaartitsiniutaasut pillugit paasiniaaqqullugu.