Pia Arkep eqqumiitsuliai Tromsømi saqqummersinneqassapput
Saqqummersitsineq tallimanngorpat ammaanersiorneqartussaq quleqataqartinneqarpoq nunasiaataanerup kingorna.
Tromsø Kunstforening, Tromsømi eqqumiitsuliortut peqatigiiffiat , aamma Samisk Kunstfestival, saamit eqqumiitsuliortuisa suliniaqatigiiffiat, saqqummersitsinermik aaqqissuisuupput, tamannalu isumasioqatigiinermik ilaqartinneqassaaq, novemberip ulluisa 20-anni 21-annilu ingerlanneqassalluni. Isumasioqatigiinnermi qulequtarineqassaaq nunasiaataanermit nunasiaataajunnaarmut aqqut.
Pia Arkep eqqumiitsuliaasa saqqummersinneqarnerisa saniatigut saamip eqqumiitsuliortup Katarina Pirak Sikkup Sverigemeersup eqqumiitsuliai aamma saqqqummersinneqassapput.
Isumasioqatigiinnermi Kalaallit Nunaat peqataatitaqassaaq tassalu inuiaat ineriartorneranni ilisimatusartoq Socialantropolog Aviâja Egede Lynge .
Saamit Norge-meersut Sverigemersullu isumasioqatigiinnermi aamma peqataassapput.