Petrus Brønlund unammisinnaanngoqqippoq
Kattuffimmi siulersuisut januaarip ulluisa aqqaneq-aappaanni ataatsimiinnerminni Petrus Brønlund pillugu taama aalajangiipput.
Nerrivimmi arsaarartartut nunatsinni pikkorinnerpaat ilaat siorna maajip qaammataani ingerlaannaq atuutilersumik unammisartujunnaarsinneqarallarpoq.
Sukasaatinik atuisoqarsimanersoq nunatsinni pissartanngorniunnerit nalaani misissuisoqarmat paasinarsivoq Petrus Brønlund hashimik pujortarsimasoq.
Hashi sukasaatitut nalilerneqarsinnaanngikkaluartoq timersornerup silarsuaani inerteqqutaavoq, nukkassaatit akiorniarneqarnerat pillugu ataatsimiititaliaq taama aalajangiivoq.
Nerrivimmi arsaararluni nunatsinni pissartanngorniunnerit marsip qaammataani Paamiuni ingerlanneqassapput, Petrus Brønlundilu pissartanngorniunnissamut peqataasinnaanngorpoq.