Petermannip Sermiani qupparsuaq NASA-mit assilineqartoq
Puttaarujussuit 250 aamma 130 kvadratkilometerisut annertussusillit Petermannip Sermianit 2010-mi 2012-imilu kaanngarput. Sermimi nutaamik quppaqalersimasoq NASA-p assilisaani nutaani maanna takuneqarsinnaavoq.
Assit NASA-p suliniutaanit Operation Icebridgemeersuupput. Nunatta avannaarsuarni Sikuiuitsumilu kujallermi sermimik assilisat suliniummi pineqartumi katersorneqarput, aviisi The Washington Post taama allappoq.
AAMMA ATUARUK Puttaarujussuaq kaanngartoq
Petermannip Sermianik timmisartumit assilisat sapaatit-akunnerata siulianeersut takutippaat quppap pioreersup ungasinngisaani allamik qupparujussuaqalersimasoq. Washington Postip paasissutissaatai naapertorlugit quppat taakku marluk imminnut qanilliartuinnassappata puttaarujussuarmik kaanngartoqarsinnaavoq.
Hollandimi ilisimatusarfimmi Delft University of Technologymi professorip Stef Lehrmittep quppaq qaammataasanit assilisat atorlugit paasisimasani qulaanit assileqqullugu NASA qinnuigisimavaa.
Professori naapertorlugu quppaq nalinginnaanngitsuuvoq sermip qeqqanit aallaaveqarmat, pisarnertut saneraanit aallaaveqarani.