Puttaarujussuaq kaanngartoq
Puttaarujussuaq taanna Nares Strædemi, tassa Nunatta Canadallu akornanniittumi ikerasakkoorluni kujammut maanna ingerlaarpoq.
Ritzauimit oqaatigineqarpoq, Nunatsinni 1962-ip kingornagut aatsaat taamak annertutigisumik sermimik kaanngartoqartoq.
Taama pisoqarnera nunarsuup kiatsikkiartorneranik patsiseqarnersoq ilisimaneqanngilaq, tamaanimi sermip eqqaani immap kissassusaa, 2003-p kingornagut aatsaat uuttorneqartalermat.
Taamatut sermip ilanngarujussuarnera, Nunatta sermersuata siunissami sukkatsikkaluttuinnartumik aakkiartorneranut takussutissaassagunartoq, Greenpeacep silap pissusaanut paasissutissiisartuini pisortap Stefan Flothmannip nalilerpaa.
- Kalaallit Nunaata sermersuata imaanut ilanngartarnerata anneruleriartornissaanut, Petermann Gletscherip ilanngarujussuarnera assersuutissaannaasoq, taanna Ritzauimut oqarpoq.