Peter Olsen: Aalajangerniarninni aliasullungalu uummallussimaqaanga
Peter Olsen kommune Qeqertalimmi taaguunneqarnerpaasoq naalakkersuisunngorniarluni aalajangerpoq. Aalajangerneq imaannaasimanngikkaluartoq Ilinniartitaanermut, Kultureqarnermut, Timersornermut Ilageeqarnermullu sullissineq pitsaanerusariaqartoq ilaatigut isumaqarpoq.
Sooruna naalakkersuisunngornissat borgmesterinngornissanniit salliussumaviuk?
- Soorunami taamatut periarfisseqarama eqqarsaaterpassuit kaavissimapput, kisianni nalilersueqqissaarninni nunarput tamakkerlugu ilinniartitaanikkut atuarfeqarnikkut, kulturikkut timersornikkut ilageeqarnikkullu pitsaanerusumik sullinneqarnissaminut pisariaqartitsisoq nalilersimavara. Taamaattumik ukiuni ikinnerpaamik arfinilinni inatsisartutut sulisimaninni taakkununnga tungaatigut misilittagaqarlualersimavunga, taammaattumik peqataasinnaallunga aamma kivitseqataasinnaallunga isumaqarpunga, Peter Olsen oqarpoq.
AAMMA ATUARUK Ane Hansen Kommune Qeqertalimmi borgmesteritut atuuteqqissinnaasoq
Kommunimut qinersisinnut 442-nut arlaannik oqaasissaqarpit?
- Facebookikkut nalunaaruteqarlunga nassuiaateqarpunga sunarpiaq pillugu naalakkersuisunngornissaq toqqarsimanerlugu, aamma qinersisut qutsatissaqarfigingaarakkit. Aamma Aasiammiut utoqqatserfigivakka neriullungalu aalajangertariaqarsimanera pillugu isumakkeerfigineqarumaarlunga . Ajoraluatumik uggornaraluartumillu qinersinerit taakku ataatsikkoortooramik. Soorunami aamma uanga nammineerlunga siumut takoreersinnaanngilara sumut killikkumaarnerlunga. Arlaannaannulluunniit isissanerlunga soorunami siumut takoreersinnaanngilara, taamaattumik periarfissat tamaasa qineqqusaarfigisimavakka – arlaannut qinigaaguma, tassa taanna tigujumaarlugu. Taamaattumik aliasussimaqaanga aamma uummallussimaqaanga taama aalajangertariaqarnera pillugu. Kisianni oqarnittuut soorunami oqimaalutaanerusimavoq, Peter Olsen oqarpoq.
Taava sooruna naalakkersuisoorusunnerullutit kommunimut aamma sassarpit?
- Soorlu oqartunga qinersinermi sumiluunniit nalunartuaannarpoq qinigaassanerluni imaluunniit qinigaassannginnerluni. Taamaattumik siumut oqareeraluaruma qanoq iliorniarnerlunga soorunami aamma inuit nalornilissapput, taamaattumik aamma taanna nalornineq pinaveersaarniarlugu soorunami siumungaaq nalunaareernaveersaarpunga. Soorunami nalunngereersimasuugukku nuna tamakkerlugu aajugaassasugut aalajangerneqareersimasuuppat siumungaaq oqareersimasinnaagaluarpunga taamaaliorniarlunga, kisianni tassa allatut ajornaqaaq, taamaakkami, Peter Olsen oqarpoq.
