Peter Irniq: Oqaatsit kinaassuseqalersittarpaatigut

- Oqaatsit inuit kinaassutsiminnut ilisarnaatigaat, Radioaviisimut taama oqaaseqarpoq siornatigut Nunavummi kommissæriusoq, Peter Irniq. Taassuma ilanngullugu oqaatigaa, oqaatsitta taamaalilluta tassaalersikkaatigut, naggueqatigiit Inuit.

Sapaatip akunnerani tulliuttumi nunatsinni taasisitsinissaq Peter Irnerup nuannaarutigaa, tassami namminersorneq akuersaarneqarpat, kalaallit oqaasii pisortatigoortumik oqaasiulissammata.

Peter Irniq naggueqatigiit Inuit kulturiannik paasisitsiniaasarnini pissutigalugu Canada tamakkerlugu nunarsuarmilu sumiiffinni assigiinngitsuni ilisimaneqartoq, Radioaviisimut ilanngullugu oqaatigaa, kalaallit oqaasii, naggueqatigiit Inuit oqaasiinut ilaasut, Canadami sumiiffinni arlalissuarni ilaatigullu Alaskami paasineqarsinnaasut. Naggueqatigiit Inuit oqaasii allat assigalugit, kalaallit oqaasii Issittumi naggueqatigiinni Inunni ataatsimoornermik pilersitseqataapput tamannalu siunissami suleqatigiinnerunissamut pingaaruteqaqaaq.

- Taaguutit Inuktituuneersut kalaallillu oqaasiineersut soorlu ‘qajaq’, ‘illu’ aamma ‘parka’ nunarsuarmiut akornanni ilaatigut Europamiut oqaasiini oqaasersiatut atugaareerput, Peter Irniq oqarpoq.

Canadami oqaatsit pillugit ingerlariaqqittoqareerpoq. Tassa Canadami Senatimi Inuktitut pisortatigoortumik atorneqalereerput. Tassa Senatimi Inuktitut oqaluttoqarpat, nutserisunik tuluit oqaasiinut imaluunniit franskisuumut nutserisussanik piareersimasoqartuaannarpoq. Canadamiut inatsisartuini Inuktitut oqaluttoqarsinnaavoq, kisianni Inuktitut oqaluttup oqaatsini nammineerluni nutsertariaqarpai, tassanimi suli nutserisoqanngimmat. Taamaattorli oqartoqarsinnaavoq Canadap naalakkersuisuini oqaatsit Inuktitut pingaarutilimmik inissisimasut, Peter Irniq oqarpoq.