Peter Frederik Rosingimut eqqaaniut

KNR-imi ukiorpassuarni suleqataasimasoq nuimasoq, radiumi pisortaasimasoq Peter Frederik Rosing, sivisuumik napparsimareerluni, 70-inik ukioqarluni toquvoq. Ukiorpassuarni suleqatigisimasaata Stephen Heilmannip Peter Frederik Rosing ikinngutimisut KNR-imilu tamatigoortumik suleqataasimanera pillugu eqqaaniaavoq.
Allattoq Steffen Heilmann
maajip 30-at 2011 16:01

Peter Frederik meeraallutali paasivarput anguniakkaminik ilungersuutiginnikkaajusoq, aammali quianartussarsiullaqqissuusoq. Qasseriarlunimi ilimaginngisatsinnik illartittarpaatigut.

Peter Frederik realskolimi 1959-imi soraarummeereerluni KNR-imi, atuleqqammersumi, nipilerisutut ilinnialerpoq. Tassani tusagassiorneq soqutigisarilerlugu Journalisthøjskolimi atualerpoq, 1970-imilu Nunatsinnut uterami Radioaviisimi sulilerluni. 1976-imi radioaviisimi aaqqissuisunngorpoq 1980-imi KNR-imi pisortatut atorfininnermi tungaanut.

Nutaanik misigisaqarniarluni Namminersornerullutik Oqartussat Tusagassiivianni 1988-imi pisortanngorpoq, ukiullu arfinillit tassaneereerluni radioaviisimut aaqqissuisutut uterpoq 1994-imi.

Ukiorli ataasiinnaq radioaviisimeereerluni KNR-ip Kultureqarnermut Aliikkkutassaqartitsinermullu immikkoortuani pisortanngorpoq, 1998-imi KNR-imi pisortaaninngornissami tungaanut. Peter Frederik KNR-imit soraarpoq 2001-imi, namminersortutullu sulilerluni.

KNR-imiinnermini aallakaatitassiarpassuit kulturimut tunngasut immiussimavai, ilaatigut Tunumeersut. Aammali quioanartussarsiullaqqissuugami meeraaqatigisimasami ilaat, Peter Hammeken, ilinniartitsisorlu Karl Kruse peqatigiillutik 1970-ikkunni arfininngornikkut aallakaatittarpaat ”Radio IPA” (= radio illit pillutit atavoq). Amerlanersatta Peter Frederiup taakku ilaanni taalliaasa ilaat tusarsimassajunnarsivaat, tassalu ”Iluarsisariallit taagugassavut amerlaqaat”.

Atuakkanik nutserinermittaaq saniatigut ingerlataqartarpoq, pingaartumik soraarninngoreernermigut.

Atuakkiortuuvortaaq, soorlu ”Radiormiut”, Marianne Stenbæk peqatigalugu 1999-imi saqqummersitaa, pingaartumillu Jonathan Motzfeldtimik ilisarititsilluni atuakkiarujussua, 2008-mi saqqummersoq.

Peter Frederik kalaallit oqaasiinik atuisinnaalluarnerpaat ilagaat,  atuakkanillu kalaallisuunngortitsisarnermigut  nunani allamiut atuakkiaannik kalaallinut ilisarititsisarluni. Taamaammat Atuakkiortut Peqatigiiffiata 2010-mi Frederik Nielsenip aningaasaateqarfianit nersornaaserpaa.

Kalaallit Nunaannut ernerulluartoq, anguniakkaminik ilungersuussinikkaaq, quianartussarsiullaqqissorlu akornatsinniikkunnaarpoq.

Peter Frederik Rosingip eqqaaneqarnera ataqqinartuuli!

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk