Peter Christensen Danmarkimi illersornissamut ministerinngussaaq
Carl Holst ulluni 93-iinnarni illersornissamut ministerioreerluni mamianartuliat arlallit pissutigalugit marlunngormat tunuartoq Venstremeersumit Peter Christensenimit kingoraarneqassaaq.
Danskit ministeriunerat Lars Løkke Rasmussen (V) Facebookimi taama allappoq.
- Nunatta illersornissamut nunanillu avannarlernik suleqateqarnermut ministerertaassaa, Peter Christensen, ilisaritikkiartorlugu Amalienborgimukarpunga.
- Illersornissamut milliarderpassuarnik aningaasaliinissaq illersornissarlu pillugu isumaqatigiinniarnissat tunngavigalugit inummik inatsisartuni sulinermik misilittagaqarluartumik Christiansborgimilu ataqqineqartumik toqqaanissara pingaartissimavara, Løkke Facebookimi taama allappoq.
AAMMA ATUARUK Danmarkip illersornissamut ministeria tunuarpoq
Peter Christensen Folketingimut juunimi qinersisoqarmat qinigaanngitsoorpoq. Siornatigut akileraartarnermut ministeriusimavoq aammalu Venstrep politikkikkut oqaaseqartartorisimallugu.
Peter Christensen qinigaanngitsoornermi kingorna Folketingimi ukiuni 14-ini politikkimik suliaqarnini taamaatillugu nalunaaruteqarpoq.
- Venstre Dansk Folkepartimit ajorsartitaarujussuarpoq - aamma uanga, qinersinerup kingorna Facebookimi taama allappoq.
Juunimi qinigaanngitsoornera arlalinnit tupaallaatigineqarpoq, Peter Christensenimi talerperliit naalakkersuisunngortitsineranni aningaasaqarnermut ministerissatut ilimagineqaraluarmat. "PC-mi" (taaguutaa, aaqq.) Lars Løkke Rasmussenimik illersuisut sallersaasa ilagaat.
/ritzau/
