Peter Brixtofte ukiut marluk parnaarussaasussanngorpoq

Peter Brixtofte Østre Landsretimi ukiut marluk parnaarussassanngorlugu ullumi eqqartuunneqarpoq, tamannalu Brixtoftep iluarinngilluinnarpaa. Piginnaatitaanermik atornerluerujussuarsimasutut ukiut marluk parnaarussassatut eqqartuunneqarneq, Farumimi illoqarfiup kunngerisimasaanut uissuumminartuuvoq, pineqaatissinneqarninilu “uppernanngitsutut” taavaa:

- Pineqaatissiineq pissusissamisuunngilluinnarpoq akuerineqarsinnaananilu, tassami iliuuserisimanngisat pillugit pineqaatissiisoqarsinnaanngilaq. Pineqaatissinneqarnera ullut 14-it ingerlaneranni inatsisileritooralu misissorluassavarput taavalu eqqartuussiviit qullersaannut ingerlateqqissanerlugu aalajangerumaarparput, Peter Brixtofte oqarpoq.

Peter Brixtoftep pineqaatissinneqarnini ingerlaannaq eqqartuussiviit qullersaannut ingerlateqqissinnaanngikkaa, ingerlatitseqqinnissamulli aalajangiisartunut qinnuteqaatigisinnaagaa eqqartuussiveqarnermik ilisimatuup Lars Bo Langstedip oqaatigaa.

- Nammineerluni eqqartuussiviit qullersaannut ingerlateqqissinnaanngilaa. Ingerlatitseqqissaguni ingerlatitseqqinnissamut aalajangiisartut qinnuteqarfigisinnaavai. Kisianni qinnuteqaamminik iluatsitsinissaa eqqartuussiveqarnermik ilisimatuup ilimagivallaanngilaa.

Lars Bo Langstedip aamma oqaatigaa Brixtoftep ukiuni marlunni parnaarussassatut pineqaatissinneqarnermigut aamma Furesøp kommuniani byrådimi ilaasortatut tunuartariaqassasoq.

Tassami malittarisassat naapertorlugit pineqaatissinneqaraanni byrådimi ilaasortaasoqarsinnaanngimmat.

Brixtoftep pineqaatissinneqarneranut patsisaavoq, borgmesteriunermi nalaani Skanska-p timersortarfimmik nutarterinerani 9 millioni koruuninik amerlanaarlugu kommune akiliisissimagamiuk, taamaalilluni Skanskap aningaasat taakkua assammik arsartartut peqatigiiffiannut Ajax-Farum-imut aningaasanik tapersersortitut atorsinnaaniassammagit. Taanna Farum Boldklubip, Brixtoftep siulittaasuuffigisaata, ataani peqatigiiffiuvoq. Østre Landsretip pineqaatissiinera Hillerødip eqqartuussiviata siusinnerusukkut aalajangiineranik aalajangersaaneruvoq. Aalajangersaanerup tamatuma eqqartuussiviit qullersaannut ingerlateqqinneqarnissaa Brixtoftep maanna qinnuteqaatigisinnaavaa.