Pervez Musharraf sakkutuunut qullersaanerminit tunualersaalerunarpoq

General Musharrafi nammineq sakkutuut qullersaattut tunualersaarluni oqartoq tusarneqanngikkaluarpoq. Partiilli Musharrafimik tapersersuisup allattuunera, Musharrafip isummaminik misiliilluni oqartittagaa, kingornalu sallunerarsimasinnaasaa, oqarpoq Musharraf præsidenstitut qinerneqareeruni sakkutuut qullersaattut tunuassamaartoq, generalitullu atisani, Pakistanip inatsisai malillugit præsidentiusumut atoqqusaanngitsut, ateqqinniarnagit. Pakistanimili sakkutuut inatsisinik sumiginnaariaannaasarput. Præsidenti toqqaannanngikkaluamik inatsisartunit, nunallu immikkoortortaani sisamani aqutsisunit, qinerneqarnikuuvoq amerlanerussuteqarlunilu. Musharrafilli nuannarineqarunnaariartuinarnerata kingunerisinnaavaa partiit illuatungiliuttut, siuttuisalu pinerluuteqarsimaneragaallutik nunani allani nunasisimasut, amerlanerussuteqalernerat. Kingusinnerpaamik januaarimi qinersisoqartussaavoq. Eqqartuussiviit qullersaannut, arlannulluunniit pituttorsimanatik sulilersunut, Musharrafip præsidentiutigaluni sakkutuunut qullersaaginnaruni inatsisinik unioqqutitsissanerarlugu illuatungiliuttut avoqqaraat, tamannalu Musharaffip ullumi sakkutuut qullersaattut tunualersaarneranik tusakkanut pissutaasorineqarpoq. Eqqartuussiviit qullersaata præsidentimut sakkutuunulluunniit pituttoqqanani sulisinnaalernera Musharraffimut akornutaasut pingaarnersaattut inisseriaannaavoq. Musharrafili suli USA-miit Tuluillu nunanniit tapersersorneqarami pissaaneqaqaaq. Taamaakkaluartorli imaassinnaavoq Musharrafip nuannarineqarunnaaraluttuinnarnera isertorneqarsinnaanngilluinnalersoq.