Sermeq Amerikap kujataani Perumi qaqqarsuit akornanniittoq tassaanerarneqarpoq silaannaap kissatsikkiartorneranut atatillugu maannamut takussutissatut erseqqinnerpaatut oqaatigineqarsinnaasoq.
- Sermeq taanna ukiut tallimat qaangiuppata nungoreersimassaaq, taama oqarpoq ilisimatooq sermimik taassuminnga 1978-imili ilisimatusarsimasoq Lonnie Thompson.
- Ilisimatusaleqqaarninniit sermeq 6 meterimik ukiumut millisaraluarpoq, maannali quleriaammik millisarpoq, tassa ukiuni kingullerni sermip sinaa ukiumut 60 meterimik millisalerami, ilisimatooq taanna Ohiomeersoq oqaluttuarpoq.
Sikup aannikup naqqani naasunik aamma nassaarsimavoq, naasullu taakku ukiuni 5.000-ni sermip ataani tarrisimasimapput.
- Tassa imaaginnarpoq ukiut 5.000-t matuma siorna kiattupilorujussuusimavoq, ilisimatooq Lonnie Thompson oqarpoq.