Perumi orpippassuaqarfik norskinit aserorterneqarpoq
Norskit uuliamik aningaasaateqarfiata uuliasiortunut Amazonemi orpippassuarni ingerlanneqartartunut aningaasaliineratigut orpippassuit tamaanilu indiaanerit inuunerat aserortippaat. Taama Nrk ullumi allappoq.
Uuliamik aningaasaateqarfik ilaatigut Perumi uuliamik ujaarlernermi uuliasioqatigiiffik Repsol YPF uuliasiorneranni 2,2 milliardinik norskit koruuniannik aningaasaliissuteqarnikuupput. Suliffeqarfik taanna avatangiisinut innarliisimasutut kiisalu tassani nunap inuiisa pisinnaatitaaffiinik innarliisimasutut pisuutinneqarpoq.
Imeqarfippassuit kuuillu uuliamik qernertuinnaapput. Siallertarfiup nalaani mingutsitsineq kuussuarnut seerisarpoq taamaalillunilu mingutsitsineq siaruaattarluni. Perumi peqqinnissaqarfimmi oqartussat indianerit peqqissusaat misissorsimavaat, tassanilu uppernarsarsimallugu indianerit aavi annertoorujussuarmik kviksølvimik, aqerlumik kiisalu kadmiumimik akoqartut.
- Ingasappallaarujussuaqaaq. Suliffeqafiit taakku arlaannaataluunniit aningaasaliiffigissanngilai, taama oqarpoq Anders Krogh, nunat tamat suliniaqatigiiffianni Reinforest Foundationimi Norgep immikkoortortaani Regnskogfondimeersoq oqarpoq.
