Persuttaasartut amerlagaluaqisut qimarnguiit arfineq maluinnaapput

Naak nunatsinni persuttaaneq pillugu politiinut nalunaarutiginninnerit nunarsuarmi amerlanerpaanut ilagaluartut, qimarnguiit naammanngillat. Tarnip pissusaanik ilisimasalik arnallu suliniaqatigiiffianni 8. marts-gruppimi ilaasortaq Naaja Nathanielsen, taama isumaqarpoq.
Allattoq Jens Thorin
februaarip 19-at 2009 16:14

Naaja Nathanielsen isumaqarpoq, Nunatsinni persuttaasartorpassuit ikilissappata, qimarnguiit, maanna arfineq marluinnaasut, amerlineqartariaqartut. Aammali avatangiisit akuliussinnaalernissaaq pisariaqartoq isumaqarpoq.

- Persuttaasartunut, persuttarneqarsimasut ilaqutariinnilu pesutaaffiusuni meerartaasunut periarfissaqartariaqaraluarpoq. Kisianni persuttaasarnermit misillertitaasut ullumikkut saaffissaat ajornaluartumik ikipput, Naaja Nathanielsen oqarpoq.

Taanna isumaqarpoq, persuttarneqarsimasut kanngusuttariaqanngitsut, namminneq pisuussuteqanngimmata.

- Persuttaasoq annersitsinissamit allaanerusumik periarfissaqartuaannarpoq. Paqumisuttarneq qaangertariaqarparput, soorlu kinguaassiutitigut innarliisarneq eqartorsinnaalersimagipput.

Annersaasartunut oqarsinnalertariaqarpugut, tassa naammaleqaaq. Annersarneqartut kisimik taama pissanngillat, aammali uagut tamatta annersaasartunik annersarneqartartunillu ilisarisimasaqartugut aqqusinermiluunniit naammattuuisugut inerterisariaqarpugut, tarnip pissussaanik ilisimasalik Naaja Nathanielsen oqarpoq.

Qimarnguiit Nunatsinniittut arfineq marluk siorna 794-eriarlutik saaffigineqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq