Persuttaasarneq oqallisigissavaat

Inuit amerlaqisut persuttaasarneq naammattoortarpaat – angerlarsimaffimmi, peroriartornermi, eqqaamiuni imaluunniit aqqusinermi.
Allattoq Elisa Isaksen
novembarip 20-at 2007 07:13

Aamma amerlaqisut qanoq pissuseqarfigissanerlugu nalornisoorutigisarpaat.

Sapaatiuppat novembarip 25-anni suliniaqatigiit ’8. marts’ Nuummi peqqissaanermut ilinniarfimmi ataatsimiititsiniarput, angerlarsimaffimmi persuttaasarneq tamatumalu meeqqanut eqquisarnera sammineqassallutik.

Matumani novembarip 25-at malunnartinniarneqarpoq, tassaasoq arnanut persuttaasarnerit akerlilerlugit Naalagaaffiit Peqatigiit ullorititaat.

Danskit suliniaqatigiiffiannit Mødrehjælpenimit tarnip pissusaanik ilisimasallit marluk oqallissaarissapput. Mødrehjælpen ukiorpaalunngortuni arnanut meeqqanullu persuttaanertalimmik inuuneqartunut katsorsaanermik neqerooruteqartarput, misilittagaqarfigilluakkaminnik.

Oqallissaarinerit ilisimasallu siammarterneqarneri aqqutigalugit ’8.marts’ allanut qilersorsimanngitsumik suleqatigiiffiuvoq naligiissitaanerulernissaq suliniutigalugu.

Ukiumut marloriarlutik aaqqissuussisarput tassa novembarip 25-anni, arnanut persuttaanerit akerlilerlugit Naalagaaffiit Peqatigiit ullorititaani kiisalu marsip arfineq pingajuanni nunarsuaq tamakkerlugu arnanut ulloritinneqartumi.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq