Persuttaasarneq kikkunnit tamanit oqartussaaffigineqassaaq
Persuttaasarneq oqaluuseriunnaaraanni tammarnavianngilaq. Inatsisartut Ilaqutariit pillugit ataatsimiititaliaani siulittaasoq, Debora Kleist tamanna tunngavigalugu inassuteqarpoq, persuttaasarneq ammasumik eqqartorneqartuartariaqartoq.
- Kinaluunniit persuttarneqartoq naammattoorutsigu inuttut tamatta pisussaaffeqarpugut ajortoqarnera pillugu kalerriisarnissatsinnut, Debora Kleist oqarpoq.
Persuttaasarneq akiorniarlugu sisamanngormat Nuummi ingerlaaqatigiittoqarpoq, inuit 200-t pallillugit peqataaffigisaannik.
Ingerlaaqatigiinneq aaqqissuunneqarpoq arnap 54-nik ukiullip aapparminit persuttarneqarluni toqutaanerata kingorna, ingerlaaqatigiinnermik aaqqissuisuullutik naligiisitaanermik suliniaqatigiiffik 8. marts gruppen.
- Naligiisitaanermik suliniaqatigiiffiup tapersersueqqusinera, sinerissami kikkunnit tamanit peqataaffigineqartariaqarpoq, taamaaliornikkut tamatta takutissavarput, arnanut inoqatinullu allanut persuttaasarneq akerlerigatsigu, Debora Kleist oqarpoq.
Persuttaasarneq oqaluuseralugu ipitinneqartariaqarpoq, taamaaliornikkut meeqqat inuusuttullu persuttaaasarneq ajortuusoq ilikkassammassuk.
- Sapinngisarput tamaat atorlugu persuttaasarnerup ulluinnarsiutaajunnaarnissaa anguniartariaqarparput, IA-p Intsisartuni ilaasortaatitaa Debora Kleist oqarpoq.