Persuttaanermut atatillugu niviarsiaqqat tigummigallagaasut

Niviarsiaqqat inuusuttuaqqat marluk, aappaa 15-inik aappaalu 16-inik ukiullit, Qaqortumi politiinit tigusarineqarput, niviarsiaraq 16-inik ukiulik persuttarsimammassuk. Persuttaaneq pivoq pingasunngornerup ullaassaani. Niviarsiaqqat persuttaanerat sakkortummat, tigusarineqarnissaat Qaqortumi politiinit pisariaqartinneqarsimavoq.

Nivissat taakku januaarip 29-anni eqqartuussivimmut sassartinneqarnissamik tungaanut Qaqortumi pinerluuteqarsimasunut inissiisarfimmut inissinneqartut, nunatsinni politiit pisortaata tulliata Morten Nielsenip oqaatigaa. Nivissat pinerluuteqarsimasunut inissiisarfimminnissaat tulluartinneqanngimmat, eqqartuunneqarnissaasa tungaanut inissinneqarallarfissaannik, kommuuni maannakkut misissuivoq.

Niviarsiaqqat persuttaasimanerat pillugu, Morten Nielsen annertunerusumik oqaaseqarusunngilaq.